鳳凰衞視女主播沈星（圖）上周遭姓李嘅前男友強闖香閨，對方發現屋內有一名吳姓富商，兩人大打出手。事件充滿娛樂性，內地傳媒立即搵出一堆約46歲嘅吳姓富商，當中，港人比較熟識嘅，包括前主播楊瀾老公吳征、雷士照明（2222）創辦人吳長江，佢哋都否認關自己事。
沈星噚晚亦發聲明澄清，指「李某」唔係前男友，「吳姓富商」之說無稽，又強調自己所有經濟來源都係多年工作收入累積番嚟，同埋投資所得，絕冇與任何人有任何金錢往來或糾葛。
呢單嘢咁富娛樂性，難怪大家爭住否認。好似吳征咁，直情要同太太楊瀾先後喺網上澄清，楊瀾指兩人嗰幾日一直接待製片朋友，由朝忙到晚。
吳長江透過發言人指當日不在港，而且48歲，唔符合相關形容呀。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange