終於買到飛入場睇《狂舞派》，這套冇明星、冇投資的電影，單憑口碑仍可力撐票房，證明香港電影，還有眼睛雪亮的觀眾。劇情有輕鬆搞笑、有勁舞勵志，但導演黃修平的中心思想，才最打動人心：「為了夢想，你可以去到幾盡？」實在值得很多人反思，不只年輕人，還有父母。
早前文憑試放榜，有位乒乓神童因要練波，只用同學十分一時間溫書，仍獲港大法律系收錄；面臨應該讀書，還是放棄學位專心打波、博入明年奧運的人生抉擇。這議題在我的家人和朋友中激辯了一周，不出意料，多數家長都痛陳：「梗係讀書重要！」、「打波邊搵到食？」這些話。
我也是家長，意見卻相反。首先法律系年年都招生，考取學位是20歲、25歲，甚至30歲都可做的事；但投身運動員，只有短短幾年時間，參加奧運更可能是一生，甚至好多人的好多生也做不到的事，有機會，應該做邊樣？
最重要是現今父母最擔心的，應不是「阿仔掛住打波」，而是他百無聊賴、欠缺目標方向，渾渾噩噩一世。如果仔女像《狂舞派》女主角那樣，自小發現心中那團火，還狂熱投入去到盡，做父母的，不應把火撲熄，反而該萬幸才是！我深信只要認真、投入，香港地冇話邊行搵唔到食。你喜歡捱更抵夜打着自己討厭的工，賺來美酒佳餚，但吃落無味；還是每天做着自己熱愛的事，飲淡清水都甜入心？
一副24字的對聯影響蔡瀾一生，今集《亂噏24》，蔡瀾為你逐句解釋！
點擊以下連結，全集即時重溫！
http://bit.ly/appletalk24