雷鼎鳴估計佔中會令香港一日損失16億元，聽落好得人驚，但大家都知呢類風險推算，主要睇你有乜假設，例如交易所會否停頓。商界當然最關心經濟損失，但對普通人，就未必會受，認為有「嚇鬼」成份。
商界即使反佔中或唔敢公開支持佔中，亦要思考對普選態度，向北京爭取一個合理、符合民主原則嘅選舉模式，若再繼續八、九十年代保守心態，借助北京保護其政治免費午餐，最終只會自討苦吃。
商界一直意圖靠北京壓制民主化，自己穩坐釣魚船，前提係香港有穩定之政治建制及秩序，但上次特首選舉，商界代表唐英年被紅色政客梁振英打敗，其客觀後果是將過去20年北京認可嘅商界公務員合作模式放棄，此舉從根本上動搖咗香港政治秩序，特區自此進入了政治不穩定時期，古靈精怪氣氛壓人，越演越烈。
自九十年代立法局引入直選開始，商界與官僚合作模式確立，一來英國佬先天上奉行「重商主義」，所以先會演變出市場主導意識形態，官僚也視為金科玉律，無論戰後英國執政工黨搞福利國家，香港也照樣不受影響。
商界最怕實行所得再分配政策，重稅多福利，亦因此佢哋反對民主化，以往最常聽到商界反普選言論，就係害怕李卓人當選大搞免費午餐。但實際上民主派亦知道主流中產反對福利主義，一直以來在議會內同官僚合作，小罵大幫忙，當法案及撥款夠票通過時，便象徵式投下反對票。
難再捍衞自己友利益
梁上場後建制分裂，決策變成黑箱，冇人知道究竟現時政府決策過程，好似房屋政策一年來混亂不堪，內部矛盾重重，土地開發胡亂突發，政務官無所適從，至於福利開支，一上場為振特首民望派老人金，已食去全年大部份福利開支，林鄭亦通過關愛基金派福利，以往官僚定下行之有效入息審查制度即將被摧毀，往後幾年政府要吸納關愛基金已派出嘅各款資助，根本唔使普選，唔使李卓人做特首，香港已逐步走上福利主義之路。
原因好簡單，梁振英、林鄭都只不過係政客，一樣按照政客思維辦事，同李卓人冇乜分別，民望低殘也只有派錢一途挽救政治命運。
當主流建制秩序瓦解、管治共識結束後，商界即使拖住普選後腳，也難再捍衞自己階層利益，且被視為與民為敵，真係蠢到加零一。
曾鈺成睇到嘅問題，田北俊亦應該睇到！商界反佔中之餘，更要顯示爭取民主改革嘅決心，千祈唔好加入低級打手之列。
添馬男
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange