周圍同人講話《狂舞派》好睇，引來資深製作人挑戰，有咁好睇咩？好多沙石喎！嗰刻我知道同佢道不同不相為謀，一個舞步轉身走人。《狂舞派》好嘢，因為套戲十足十一支英超升班馬，冇大財團支持、冇強勁球迷捧場、亦冇大牌球員，咁嘅蔗渣陣容，你唔會寄望見到銀河艦隊嘅氣派吧，偏偏一隊二打六，卻令人雀躍彈起，因為佢擁有一樣幾多錢都買唔到嘅吸引力，就係歸屬感。
娛樂化足球要賺到盡
戲入面出現嘅公和豆腐店、工廠、理工、坪石邨，甚至係那隧道口附近嘅天橋底，多少都有你我曾經嘅足迹，主場之利咪就係呢啲囉，好耐冇見但又一見如故，其實呢啲就係個個禮拜睇波感受到嘅嘢。車路士來勢洶洶，但周一晚原來係作客奧脫福，咁惡嘅自然係曼聯啦，紅魔fans心同此理。
睇完《狂舞派》嗰晚去跑步，大雨下卻發現身體不由自主向前衝，點解？可能係首主題曲喺耳邊有激勵作用，以為女主角阿花喺身邊陪跑，「流連城市人來人往，為了理想起舞吧！」彷彿時光倒流20年，瞓醒腳痛先知唔係。套戲句口號亦簡直係向金句王Peter致敬，「為了XX，你可以去到幾盡！」萬key萬靈，而我最愛的係一個盡字，唔理係乜夢想，去盡確實係令旁人着迷嘅境界，可惜足球圈已走向娛樂事業化，球員們勒住勒住，轉會加薪先係正經，賺到盡至係常識。
所以終於明白點解田徑賽咁好睇，因為雖然畫面冇乜變化，但你感受到跑手就算包尾嗰位都盡力奔跑，香港接力隊喺世錦賽包艇又如何，我見到佢哋個個搏盡咬牙切齒，無憾啦。
KEYMAN
now TV主持
一副24字的對聯影響蔡瀾一生，今集《亂噏24》，蔡瀾為你逐句解釋！
點擊以下連結，全集即時重溫！
http://bit.ly/appletalk24