香港歷史博物館由七月三十一日至十月七日，有一個「國采朝章 清代宮廷服飾」展覽，幾值得去睇吓。原來辦一個展覽要好多錢，康文署冇預算，歷史博物館就搵馬會贊助，香港人先至可以睇到清代皇帝皇后嘅服飾，你話香港馬迷及賽馬事業對香港文化有幾大貢獻呢，將來西九M+博物館落成之後，相信亦要向馬會申請贊助嚟辦大型展覽，不過聽講現任西九管理局總裁連納智Michael Lynch因為經驗豐富，見慣場面，處事十分靈活，每有商業機構搵西九龍區（現正曬緊太陽）做甚麼展覽，例如一千架法拉利，佢就識得搵銀，攞錢用嚟舉辦免費文化音樂項目，益吓本港學生。有啲不吃人間煙火，扮清高不懂世事之人批評佢商業化，佢只會一笑置之。搞高檔文化，在在需財，次次蝕本，啲錢喺邊度嚟呀，當權者如不識搵商業贊助，樣樣問立法會攞錢呀？廢嘅咩！
左丁山去睇宮廷服飾展，就諗起清宮有幾多工人為皇室造衫呀？一件龍袍要縫製兩至三年，緙金線龍袍之刺繡，每日只完成一寸，要百分百準確，要求之高，實在嚇人，造皇帝常服就比較輕鬆少少（按：蘋果日報於八月二十一日E12版之「乾隆常服圖」，應該係康熙先至啱，在歷史博物館取得之展覽簡介第七頁有同一幅相片，指皇帝係康熙，不是乾隆）。
睇完展覽，返屋企翻開宋敍五、趙善軒合著之「清朝乾嘉之後國勢衰頹的經濟原因」，第四章講「產業收縮與經濟衰退」，講清朝初年，宮廷作坊有四十二作，到乾隆十三年，裁減至十三作，京內織染局各項匠役在康熙初年有八百二十五名，至乾隆十六年裁減至七十名，至於造布之各地織造局，亦不斷收縮，康熙四十四年（1705）之後，朝廷停止每年在蘇州採辦布疋，令蘇州織布業收縮，明朝末年，蘇州紡織、布業甚為繁榮，一年造布三四十萬疋，到了乾隆三十一年（1766），每年買布四五萬疋就不能如期交貨了，可見清代皇帝為了節儉，犧牲了江南織造業，知道此歷史背景，再看清宮服飾展，更能理解當時縫製皇帝、皇后、皇妃及貴族之服飾，有其原料供應困難之處，件件來之不易。