上月31日是Sonia的生日，有公司包了她工作的餐廳搞event，三四十個客人塞爆了丼丼屋。Sonia：「班客乜鬼都投訴，全場躁底，勁奇怪。」她離開了店舖一會，回來卻發現滿店塞滿氣球，奄尖客唱歌跳舞彈結他，經理笑淫淫將她逼埋牆角：「生日箒，唔使搞咁大件事啩。」此時未婚夫Ryan才捧着花，唱着黎明情歌登場。跪下的一刻，Sonia條ram線卜一聲斷掉：「唔係呀嘛？之前我問他會否跪着向我求婚，他叫我慳啲㗎！」腦裏一片空白，淨識點頭。
豪花近五萬元，見報後惹來2百多個負評，指Ryan有錢求婚冇錢買樓，無非想招人妒忌云云，Ryan：「我就係要人妒忌羨慕，話畀大家知佢好幸福。唔係我做嚟托呀？經歷過起跌，有能力嘅，時間又到了就要做，一做就要全情投入。時機、心情過了，你有錢都未必做得返。」35歲的Ryan，是資深殯儀經理及「喃嘸佬」。早年生意失敗，媽媽又患癌需要醫藥費，他患上焦慮症，想跳樓又被家人攔下，自暴自棄：「急尿就攤喺床度屙。淨係諗點死，成日發脾氣，正宗蘇州屎。」真係搵鬼要。偏偏Sonia把人工都拿出來頂住！又說要去酒吧做兼職：「我哇一聲喊出嚟。她可以一身輕不必理會我。那些日子Sonia只帶幾百元上班，化妝品、手袋統統不買，邊個女人肯同你做到咁？我夠膽講𠵱家啲八十後冇一個得。」近年他又找到了商機，這次事業高峯比昔日的還要好十倍！3月時Ryan的媽媽走了，她走前最想他們結婚。「7月31日她生日，我哋乜都有了，佢都冇乜嘢渴求喇，橫掂都想結婚，就搞鑊杰撻撻嘅佢嘆。」雖然嘴裏說「鍾意低調」，但遇着個「鍾意浮誇」的男友，想起他為自己花了幾個月準備，又當眾唱歌，越想越甜，浮誇？認命囉！
一腳踢求婚Ann
幫Ryan搞這場上了港聞的大龍鳳，正是Ann。Ann於2010年開始做求婚策劃人，撮合超過一百對新人。她覺得，求婚，無論是浮誇定低調，都是一輩子的回憶。講到尾，來到求婚一刻，男女主角必有一定了解或在展望將來，僅欠臨門一腳。那一刻，讓女孩子感受到你對她的了解，才是最重要。Ann：「有些男生拍拖幾個月就心急求婚，但問及女友性格，喜好，感動位等都答不出，這些客我都不會接。」一時衝動？怕執輸？做人世㗎，咪玩啦。
求婚策劃
網頁： http://www.proposal-planner.net/
電話：6102 0096
自己Check
你求得婚未？
1：講得出女仔性格，特別是女仔對浪漫的定義及喜好。拍拖期間男仔曾讓女仔感動落淚的回憶等。
2：講得出一些二人的回憶。而非：「冇呀，咪行街睇戲食飯咁囉。」
3：女仔有沒有明示暗示對將來的期望。實情是，佢其實想唔想結婚。
4：拍拖期間女仔說過想做，但男仔從沒做過的事。
求婚諗大咗
你以為搵planner就可以印印腳唔使做等人幫你搞？錯！Ann話：「你搵我哋幫手，其實仲多嘢搞。」但就會將最適合你倆的奇異幻想，經過修飾同安排，變成真。所以，係時候發吓夢喇！
小儀：求愛啦啦隊
小儀想起網上的一條短片：「那是學校球賽，啦啦隊一直向着女主角表演，表演到最後才知道那是男友安排的求婚！全場同學一起拍掌見證，睇到我好感動。」
Bob：滾住求婚
「一定要將當事人情緒推到兩極。女仔歸家，一開門見女性衣褲散落一地，發現男友和女友人半裸在床，女友情緒崩潰。混亂間匿藏的朋友空群而出，男友變出婚戒跪地求婚，包保一世難忘。」
WARNING：
此招只適用於柔弱女友，若其有黑帶十段或好抽過甄子丹，後果自負。
求婚必勝道具
景不在靚，有回憶則靈。Ann說，與其為個靚景走去南生圍求婚，不如多花心思，將一個有共同回憶的地方粉飾靚靚，配合深情對話打動。鮮花、婚戒、下跪等是為必然，Ann總結出必殺求婚三寶，估你唔到。
漫天氣球
Ann：「每次在室內塞滿氣球，都會得到激賞。」唔覺喎？「被澎湃的波波包圍，加上被波波阻隔而變柔和的燈光，就覺㗎喇。」哦。
迪士尼童話國
迪士尼求婚早已流行，城堡、煙花確煞食。只要預早向迪士尼申請協辦，除可找樂園人物幫忙，還可登上巡遊花車宣示主權，再得「求婚證書」一張，免費嘅。
LED蠟燭
LED蠟燭乃黑夜求婚必備暗器。將平凡天台、碼頭、甚至街角變成夢幻舞台，最重要有回憶助陣，萬試萬靈。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange