皇家馬德里近呢10幾年粒粒皆星，嚟到巴拿比奴嘅球星一個勁過一個，但喺皇馬球迷心目中，要搵一個能代表到球會嘅傳奇，相信就只得一個，呢個人就係3年前喊住離開球會嘅「7號仔」魯爾。
前晚，球迷終於再喺巴拿比奴球場，見到呢位過去效力皇馬16年嘅忠臣，重披嗰件熟悉的7號白色戰袍，出席今年嘅巴拿比奴盃。雖然巴拿比奴盃年年都舉行，但今年嘅主題明顯係向魯爾致敬，對手正正係佢𠵱家效力嘅卡塔爾球會艾薩德，值得一提係，改由安察洛堤執教之下、首場西甲仍要坐冷板嘅門將卡斯拿斯，終於有正選，仲喺賽前將個隊長臂章交畀主角魯爾。
將「7號」交畀C朗
話明魯爾之夜，呢位36歲老將亦都冇令人失望，上半場22分鐘就走位接應迪馬利亞嘅高空傳送，控落地之後即左腳窩利勁射，打開今場比賽嘅入球序幕。半場嗰陣，魯爾就將件7號球衣，交番畀上半場着咗件11號波衫嘅基斯坦奴朗拿度(C朗)，換番艾薩德件波衫倒戈，結果睇住舊會再入4球，其中小將謝斯洛迪古斯尾段梅開二度，最終皇馬5:0大勝；勝負當然唔重要啦，反而賽後魯爾逐一同皇馬班舊隊友擁抱，場面先至最感人，搞到唔少球迷都眼濕濕。
我求大俠當年曾經好鍾意皇馬，好大程度係因為魯爾，仲印過佢件7號波衫，𠵱家得閒仲會攞出來緬懷吓，講開又講，今場魯爾着嘅7號波衫好特別，背後嘅數字係由球迷嘅相片砌成，我諗魯爾返到去，一定會鑲起呢件咁有價值嘅波衫。
皇馬官網偷賣巴利波衫
另外，今場由C朗着住嘅皇馬11號球衣，𠵱家雖然仲懸空緊，但件衫十居其九，應會落入即將以破紀錄轉會費由熱刺加盟嘅加里夫巴利手上。皇馬日前仲喺官網洩漏風聲，突然post咗巴利嘅11號球衣上去，接受球迷預訂，但有關連結好快就被刪除，但睇嚟都係皇馬自己搞鬼，放風出來逼熱刺快放人。
一副24字的對聯影響蔡瀾一生，今集《亂噏24》，蔡瀾為你逐句解釋！
點擊以下連結，全集即時重溫！
http://bit.ly/appletalk24