成功爭取！今季重返港甲嘅東方沙龍，雖然主場被編咗去冇交通工具直達球場門口兼草地質素差嘅城門谷運動場，但經過足總主席梁孔德同CEO薛基輔噚日實地視察後，終於成功爭取足總再次讓步，由原本踢3場減到踢兩場；只要對完屯門同愉園後，就正式同「地獄球場」講bye bye！
踢完頭兩場主場即鬆人
就咁講，大家可能唔會明白呢度有幾隔涉，草地有幾差，所以梁主席同薛基輔噚日應東方總監梁守志（Peter）邀請，親身到城門谷視察。咁啱遇正落雨，兩位足總高層擔住遮行咗一轉後，決定再作讓步；安排原先喺度踢3場主場賽事嘅東方，改為兩場，即係話原定第22周對天行元朗場波，唔使喺呢度踢！而今季其他主場賽，將會喺旺角場同深水埗場舉行。
原本帶緊隊喺廣州集訓嘅東方教練李健和，噚日都專登趕返嚟踩草，順便由球員角度講場草地質素︰「啲草養咗咁耐，初步睇當然可以啦，但可能有菌，因為都有啲枯咗。開季後，個場又會開放畀公眾，草地質素就唔敢保證。」至於Peter就仲厲害，噚日冇落過草地都知呢個場有幾「勁」︰「個場好唔好，大家心知肚明。我離開甲組4年，都知呢個係地獄球場，季初有草仲可接受。配套上，要球迷咁辛苦走上嚟都強人所難啦！」
為咗唔使球迷受苦，Peter噚日同足總、運輸署同警務處開完會後，仲擬定咗下月1號對屯門，同22號對愉園兩場波，分別喺荃灣西鐵路站同葵芳葵義路，各自安排5部接駁巴士，喺賽前個半鐘開始不停接送球迷去球場，認真體貼。
東方第22周聯賽唔使喺城門谷對天行元朗，後者噚日就同太陽飛馬喺青衣「拍跳」，結果元朗憑辛祖及對方嘅烏龍球，2:1險勝對手。
一副24字的對聯影響蔡瀾一生，今集《亂噏24》，蔡瀾為你逐句解釋！
點擊以下連結，全集即時重溫！
http://bit.ly/appletalk24