《壹週刊》報道內地權貴第二代「佔領中環」，紛紛在港從事投行及私募基金，大家不期然想起戴耀廷倡議之佔中行動，可能直接影響早已成功佔中的紅色權貴利益。
目前反佔中已成公關大餅，人人為阿爺出錢出力，維穩費周街派，總之就要打殘佔中三子。戴教授比較天真，一直表示唔會導致混亂，因為佢哋打不還手、罵不還口，只要警方採取清場行動便可恢復秩序。假如紅色權貴在中環有千絲萬縷利益關係，已成為中環新主人，會容許中環金融中心出現混亂，畀外資或對沖基金有機可乘，趁機衝擊香港股市嗎？
內地人隨時借鏡香港
對反佔中動機評估，其中一派認為中環金融中心涉及內地官員太多利益，因此要用盡方法阻止。我唔多認同呢個分析，無疑內地官二代進佔中環，外資亦想借佢哋關係，方便辦事。但今時今日香港金融中心地位，對內地影響已冇想像中巨大，國企IPO已好少，對沖基金08年之後已不復昔日呼風喚雨之威力，要搞香港唔容易。
對佔中恐懼來自其輻射入內地效應，內地社會矛盾比香港更尖銳，大小群眾事件無日無之，小小事便引發群眾聚焦。佢哋鄉鎮示威人士之「佔領行動」，比香港還要激烈，點似得香港人上街咁有秩序規矩。當佔中成事，香港人顯示出對普選民主嘅決心，會立即輻射入內地大城市，猶如引爆一個火藥庫。內地之所以花費巨額維穩，係因為社會矛盾尖銳，加上媒體控制減弱，群眾動員起來唔需要靠任何組織，好似月前江門市反對核廢料工廠事件，近千名群眾上街，若非市政府官員出示文件，證明暫未批准上馬，群眾隨時爆發佔領政府大樓。
由於內地形勢令香港佔中行動產生特殊效應，此非戴耀廷當初考慮，佢比較單純。上次學者有份促成2012方案，但事後泛民被批評指接受密室談判，因此學者惟有動用公開方式角力，爭取普選方案。
而反佔中真正理由，我想並非怕擾亂香港金融中心地位，波及內地，而係在於香港人爭取民主行動決心，所產生對內地群眾嘅示範效應。
添馬男
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange