「糖王」郭鶴年兩位公子喺嘉里建設（683）同香格里拉（069）兩間上市公司大執位。長子郭孔丞前日辭去嘉里主席兼執董後，香格里拉噚日就宣佈，郭孔丞重返香格里拉做主席兼執董，胞弟郭孔演辭任主席，只做非執董。
郭孔演健康一度欠佳
郭氏父子相當低調，上市公司嘅活動極少現身，向分析員同傳媒講解業務嘅工作，主要交由行政人員負責，早年新股市場大熱，唔少投資銀行搵郭鶴年入飛做基礎投資者，令佢個大名經常喺報紙同招股書曝光，但唔似其他大孖沙，佢本人從未現身新股推介會撐場。
香格里拉執董錢滿都噚日喺業績會上透露，郭孔演今年4月開始放大假，的確係因為身體有少少問題（health issue），但就拒絕透露詳情或者現時身體狀況，只係話郭孔演辭任主席後，將會專注返家族生意。
至於郭孔丞，錢滿都指佢做過香格里拉主席，公司上下都歡迎佢回歸。無論大佬還是細佬做主席，未來公司發展路線不變。
市場感到奇怪嘅係，嘉里同香格里拉嘅市值分別係468億同373億元，前者份量較重，亦因為係地產股，較受市場關注，59歲嘅郭孔丞，本身係上市公司大股東嘉里控股主席兼董事總經理，照睇應該係郭鶴年嘅繼承人，點解佢唔可以做晒兩間上市公司嘅主席，嘉里要畀老臣子黃小抗做主席呢？
李華華
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange