（咖喱篇）
林柏特今年35歲，泰利同艾殊利高爾都32歲，但小弟認為呢班車路士老將，嚟緊幾年都仲好有用。
首先喺實力上，暫時未見車路士陣中有人頂到佢哋位置，林柏特踢緊4-2-3-1中嘅2，負責連接中前場，如果要踢呢個位，必定要有良好嘅大局觀同優秀嘅長傳；拉美利斯勇猛有餘而細膩不足，雲堅基爾仲好幼嫩，桑馬達有呢個潛質，但冇理由咁後生就墮後踢防中。高爾個左閘位仲穩，隊內根本冇其他球員可代替佢，賴恩貝特蘭差太遠。反而中堅唔錯，伊雲洛域幾穩健，喺隊中資歷又夠，未來可以代替泰利。
當然，你可以話油王大把錢，如果摩連奴想踢走班老將，唔使考慮隊內有冇人接班，出去外面買就得。不過，就算美斯嚟，都唔能夠取代林柏特佢哋，因為呢班老將以前跟過摩帥，係佢嘅忠實支持者，忠心得嚟有威望；就算唔踢得，摩帥都想搵佢哋鎮住更衣室。
摩帥應該清楚每支強隊都有自己嘅氣質同底蘊，而林柏特佢哋就係代表「鐵血戰車」嘅精神。由於呢幾季車路士人腳如走馬燈轉，未睇到有新一代可以繼承到呢種精神，所以摩帥嚟緊應該要維持陣容，等伊雲洛域、拉美利斯同桑馬達呢啲中生代學識車仔嘅精神，擔起大旗，咁林柏特呢班車仔元老就可以安心退落嚟。文：咖喱
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange