港甲月底開鑼，但足總到呢刻都係懶懶閒，冇搞好過度到「港職聯」前嘅最後港甲。部份甲組隊梗係唔會等運到，紛紛出招自救；其中公民同皇室南區落實推出季票，球迷花兩嚿幾水，就可以睇晒佢哋全部主場賽事，平均每場廿蚊左右，認真抵。
上屆港甲場均人數唔夠1,000，少過前季，聯賽贊助都係啱啱先搵到，難怪唔少甲組隊高層都好多怨氣；尤其覺得「鳳凰計劃」上馬後完全幫唔到球隊，每季繼續自己掟幾百至過千萬搞波，仲要受氣。
季票兩嚿幾水超抵
由於冇人幫，加上球市轉差，各隊新季明顯加強宣傳，目的當然係吸客，唔好搞到主場太冷清。除南華同傑志繼續搞球迷會外，太陽飛馬、東方沙龍、流浪、屯門、皇室南區、公民同橫濱FC（香港）亦加入搞Fans club行列，仲推出優惠明益球迷，好似皇室南區、公民同橫濱先後公佈詳情；暫時睇皇室南區同公民就最吸引，因為只要畀250至280蚊入會費，就可以睇晒全季主場賽事，包括11場聯賽同其他盃賽主場，計落廿蚊一場左右，優惠幾吸引㗎。
東方總監梁守志話，球隊今季重返甲組，雖然本身已有一班基本球迷，但球隊贊助商已安排咗一隊人馬幫球隊宣傳，當中已落實重開球迷會，每場主場更加會繼續安排Angels入場打氣，其他優惠稍後會喺球隊facebook公佈。
另外，上季改組參賽嘅飛馬，今季有較多時間做準備，據聞亦會推出優惠搶客，包括每場首100名球迷會會員有免費雞髀同汽水。至於今季改咗去將軍澳做主場嘅橫濱，見上季送衫反應唔錯，同贊助商傾緊添食，亦會推出球員閃卡。另外亦推出500蚊嘅季票，希望吸引區內球迷入場支持。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange