雖然香港電視嘅牌照一直都未有聲氣，但佢哋𠵱家劇接劇咁開，噚日黃日華、夏雨、關寶慧，鮑起靜、唐寧及新人鮑康兒等，喺大窩口社區中心為新劇《歲月樓情》開工。
今次講佢哋成班人開中秋派對，喺台上玩踩波遊戲，唔知係咪太投入，飾演姜皓文囡囡嘅鮑康兒唔小心露出打底褲。事後佢話已做足安全措施，問佢知唔知走光？佢話：「盡量都好小心，因為對鞋好高，已經着咗打底褲。」
攞牌再請人
黃日華話呢套劇喺網上五分鐘嘅宣傳片點擊率排第三，反應唔錯，講番電視牌，佢話：「都幾樂觀，見到老細王維基都幾開朗，比初初個樣好睇咗好多，希望今年內可以發到牌。」講到有傳苗僑偉（三哥）都會簽香港電視，
黃日華話：「噚日見老細都冇講過，應該唔會啩，三哥、志偉同無綫老細咁好關係，表面睇就唔會，但一切都好難講。」
華哥話𠵱家最緊要攞咗牌先，到時就可以請更多人，對大家都有益處。
撰文：馮仁昭
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！