禮拜一，泰國同印尼出啲數據好醜樣，前者失驚無神玩衰退，後者嘅經常賬赤字又爆錶，兩地股市即散，加埋當晚美債孳息升到2.88厘，個市第日當然又隊過，條件反射下，大家忽然擔心97亞洲金融風暴會捲土重來。
姑勿論係杞人憂天定先見之明，擺在眼前嘅事實係，聯儲局一日唔講清楚幾時退市，呢個情況都難改變。
儲局退市勢掀洗倉潮
事實上，伯南克5月吹風講退市後，啲芬佬個個變哂「勁抽俠」，不斷喺新興市場撤資，印度、巴西、土耳其、印尼等無一倖免，加上區內經濟狀況轉壞，令貨幣承受更大貶值壓力，呢幾日雙印（印度同印尼）就傷得最重，盧比同印尼盾分別創新低及四年新低，四日內分別貶值近5%同4%，印尼股市更累跌近9%。
雖然亞洲國家嘅外匯儲備同財政狀況，同97年比已改善好多，金融風暴重臨機會應該唔高，但市場家陣最擔心嘅係，印度同土耳其等國家嘅企業，係呢幾年趁低息借落唔少美元債，若果貨幣貶值潮持續，啲債（折算成當地貨幣）會越滾越大，最終可能頂唔順，產生骨牌效應將令危機蔓延，所以往後如何發展，關鍵還在儲局。
儲局上月會議紀錄前晚揭盅，大部份理事都認同主席伯南克年底前退市嘅主張，但係對幾時開始縮減買債就冇共識，仍要睇經濟狀況而定，當日曾傾過好唔好提高加息門檻，等失業率落到6%先開始加息，而唔係之前講嘅6.5%，但最後傾唔掂數，令市場覺得係鷹派作祟下，儲局9月可能開始真係退市，美國10年期債息噚日衝上2.93厘兩年高位，睇怕唔使幾耐，3厘呢個重要心理關口都會失守，到時個市又要先跌為敬，新興市場好可能又血流成河。
早兩日讀大教授張五常編鴻文，咁啱又提及伯南克，如果有跟開，都知教授覺得伯南克處理金融危機做得好好，覺得佢有機會名垂千古。但教授認為，伯南克熟讀經濟大師佛利民嘅貨幣理論，應該知道2%至5%通脹對經濟有利，所以推斷儲局早幾個月突然整個通脹2.5%作為加息門檻，應該唔係佢嘅主意，估計係同局內鷹派妥協嘅結果。
大教授特別提到，自從儲局放風退市後，美債孳息5月開始由1.6厘抽上近期嘅2.7厘（噚日已升穿2.9厘），期間儲局有繼續買債托價都如此，擔心儲局如果真係唔再買債，孳息可能井噴。
大教授為經濟把脈功力深厚，個水晶球準過好多市場上嘅所謂專家，如果教授不幸言中，大家都要小心睇路。
礙於儲局一旦退市勢引發新一輪洗倉潮，相信印尼盾同盧比短期難扭弱勢，追沽應該無走雞。瑞信就更估計，盧比可能會跌到70兌1美元。
奇兵
本欄逢周五刊登
一副24字的對聯影響蔡瀾一生，今集《亂噏24》，蔡瀾為你逐句解釋！
點擊以下連結，全集即時重溫！
http://bit.ly/appletalk24