發電能源現在用煤、用柴油、用天然氣、用核能、用風力、用水力、用太陽能！因要照顧到碳排放、電費、發電安全、發電穩定四大問題，用甚麼原料發電，需要小心平衡，不能得把口講，以為環保團體最識嘢，一味環保口號掛帥，誤導大眾。
經濟師Ｎ去年暫別香港，用咗近一年時間，到大陸自駕遊，除咗西藏及新疆之外，全國去勻，幾乎盡覽神州風光。與佢講起中國能源，佢話最深印象一次，係在內蒙古公路飛馳，沿途所見電廠林立，全是煤炭發電，一間接一間如香港屏風樓，但規模遠遠大得多，一望無際。經濟Ｎ下一個結論，中國總不能全部拆掉煤電廠，在可見將來，中國不可不用煤，要適應國際排放標準，中國最多將來減少用煤發電，即係話要用風電、水電、核電來推動經濟發展，配合不斷增加之電力需求。
講到核電，因日本福島事件，大家都驚晒，只有南韓及法國唔驚，繼續用核電，而呢兩個國家又唔多見有反核分子、環保團體抗議噃。德國就驚到極，並且因為綠黨勢力日大，故此全面停止核電，拚命發展再生能源（即風電，太陽能電），向丹麥學習。
據華爾街日報（七月三十一日）報導，美國電力供應之中，風力、太陽能電佔3.5%，丹麥嘅比例係30%，2020年目標係50%，成為全歐洲最「環保發電國」，德國棄用核電之後，加速走向風力、太陽能電，目前有12%電力供應來自此來源，2020年目標係35%。
如此說來，丹麥與德國咪成為世界潔淨能源模範國家？且慢，天下無免費午餐，「華爾街日報」講，平均而言，丹麥與德國住宅電費，比美國高出300%，未來十幾年，德國為求達標，要投資二千五百億美元，羊毛自然出自羊身上，問電力用戶攞番，唔通免費咩，另一個成本貴嘅理由就係風力與太陽能電供應不可靠，容易流失，為咗避免人民在停電（blackout）時不便，需要一套後備發電設施，唉吔，又係要靠傳統能源㖭！有此因素，歐洲人開始覺得潔淨能源固然好，但納稅人與用戶不斷付鈔，不知何時了。