（牛腩篇）
雖然小弟唔係高登巴打，不過對高登強帖都有留意，最近有個討論觸動小弟神經，就係有巴打問：「當年同你一齊睇電影《 那些年， 我們一起追過的女孩 》嘅女伴，𠵱家係咩關係？」有啲幸福巴打留言，已經同呢位女伴結婚，但更多巴打留言分咗手。其實《那些年》2011年先上畫，如果問當年邊個同你睇《鐵達尼號》，甚至《秋天的童話》，相信感觸更深。
懷念並唔係壞事，車路士未正式公佈摩連奴回歸時，一眾摩佬時期已效力車仔嘅球員都開定腔歡迎；而摩連奴對舊部亦繼續重用，林伯都好識做，用入波慶祝摩佬回歸。下周一場曼聯主場對車路士嘅英超大戰，都可以預期車仔班《那些年》人物，會對番紅魔嘅傑斯、里奧等傳奇。
不過以摩連奴𠵱家呢個陣式，中前場講求高效率，對侯城就話冇咩問題，面對年輕當打嘅阿士東維拉，已經有啲吃力；要呢班舊部捱足成季基本上冇咩可能。當然摩連奴都唔係儍，今次再返車仔，初期點都要做番啲嘢嚟氹住阿巴同球迷；好似阿巴要佢打番起費托，咪重用佢囉，知道泰利、林伯等喺車仔球迷心目中不可或缺，季初點都重用。
其實講班底厚，個人認為車仔勝過曼市雙雄，可以預期季中後，摩連奴會慢慢將重心移向夏薩特、奧斯卡等年輕球員，就可以既送大禮又保持穩定。文：牽牛
一副24字的對聯影響蔡瀾一生，今集《亂噏24》，蔡瀾為你逐句解釋！
點擊以下連結，全集即時重溫！
http://bit.ly/appletalk24