回顧香港電影發展史，不同年代童星輩出，但最令人深刻的，始終是五、六十年代那一脫童星：馮寶寶、黎小田、李小龍及徐小明等名字看似柔弱、惹人憐惜，但位位都是獨當一面且享譽盛名。他們以戲棚為家，以明星為伴，邊幫補家計，邊學懂處世，長大後均成大器，是小時了了，大亦必佳的引證。最重要是從他們身上，我們看出昔日艱苦但美好的歲月、以及逐漸褪色的舊香港精神。
撰文：楊潔雯
三歲跑龍套，四歲做配角，五歲擔正，一直到十四歲，參與過一百二十四套粵語片，她是童星中的童星，她叫馮寶寶。看到馮寶寶即場演繹人生的第一句對白，確信她自出娘胎，體內已經潛藏着豐富的演戲細胞，日前香港電影資料館「童星•同戲」展覽揭幕，馮寶寶接受訪問時，一字不漏說着四歲時背誦的第一段對白，她說：「嗰句對白就係『記得細時好，跟娘去飲茶，門前磨蜆殼，巷口撥泥沙，雙腳騎獅馬，屈針釣魚蝦，如今成長大，針線亂如麻。』」說時手舞足蹈，聲線抑揚頓挫，令人嘆為觀止。不要忘記，當時的馮寶寶，只得四歲。
自比了哥 模仿力強
寶寶姐不以為然，一直以來，她認為自己只是一隻會跟着人說話，擅長模仿別人的了哥：「因為我兩歲就背晒唐詩三百首，我唔係跟馮峰大㗎！我係寄養，我寄養喺一個老太太度，咁佢係個古典、古裝人，當唱歌仔咁樣，將唐詩三百首好似唱歌咁唱畀我聽。嗰時又唔識嗰啲字，唔知乜解究？我𠵱家話畀人聽，我點解記得呢？因為我係了哥。」寶寶姐突然扮了哥說話：「恭喜發財，恭喜發財！Hello！Hello！」然後仰天狂笑，再說：「人哋成日喺個籠度，叫恭喜發財，我咪恭喜發財。天生出來？我唔知呀！」相信是天賦！
為了幫補家計，寶寶姐戲棚為家，以攝製隊為伴，她笑說：「三歲《小冤家》做茄喱啡，電影資料館都有，有一次睇到佢哋個list，嗰套係何非凡，我係坐喺度食嘢。拍戲最慘就係冇得瞓，我都幾乎唔返屋企瞓，試過三日三夜冇得瞓㗎，我有張帆布床就放定喺個片場出面，咁仲要喺A廠拍，B廠拍，我咁樣去，到時就有人『秤』我去，咁嗰時又唔需要睇劇本，埋到位又係做了哥，好似做《小甘羅拜相》，咪講『丞相今日繞道而行，有失遠迎』就係咁！係咁拍，一拍完一個鏡頭或者打光就喺度『恰』，有時半夜三更起身拍咪塞粒話梅，酸咪擘大眼，跟住埋位，話呢個鏡頭要喊，咁咪喊囉！」八十年代嘟嘟姐鄭裕玲叫「鄭九組」，原來早在六十年代，已經有個「超人寶寶」馮寶寶。
睡眠不足，又長期受壓，對一個心智未發展的兒童來說，會造成深遠的影響，不過，今日的寶寶姐憶起一幕幕童年回憶，她竟然可以重新包裝，用搞笑手法敍述出來：「當年有個劇務嚇過我之後，我幾大都唔NG，佢話『𡃁妹，你小心呀！你講錯賠菲林呀！』嘩！我諗賠菲林會打㗎喎！咁就幾大都唔賠喇！如果真係錯到兜唔到呢，我就喊成個鐘頭收唔到聲，所以佢哋就唔鬧我，我都收唔到聲。所以我係嚇大，你唔使嚇我！哈哈哈哈！」
大病三場 學懂釋懷
曾經怨恨父親馮峰視己為搖錢樹，今日的馮寶寶感覺釋懷，她說：「我諗係天父，唔係我自己，係天父將我放喺我爸爸生命裏頭，因為佢有難，有十幾個仔女要養，擺我喺度幫輕吓佢。」馮寶寶一反常態開懷暢談，全因她去年大病三場，悟出人生道理：「本來我唔係咁open講嘢，因為我舊年入咗三次醫院，胃酸倒流，啞咗成個月，返出嚟休養一排又到胃出血，因為胃酸傷咗個胃。又到喺街暈咗，係耳水不平衡，咁我呢三次入醫院，最後一次入去耳水不平衡唔知㗎嘛！即刻照腦以為生咗個瘤，咁原來係耳水不平衡。呢三次之後，個人突然領悟到，其實唔係日日都仲喺度㗎！」
有了信仰，又懂得感恩，寶寶姐對人生種種，有一種更新的體會，她說：「呢個係過咗去喇！今日嘅我覺得好開心，亦因為今年6月9號，我應承咗我個女，係我先生個女，答應佢飛返去吉隆坡同五十幾個人分享福音，點知現場出現咗六百幾個人，嗰班老人家平均歲數係六十五至七十歲，咁我好感動，如果我冇細個呢啲戲，佢哋點會𠵱家都記得我？咁多年喇！仲要一個更感動，係有一個六十三歲女人，佢推住張輪椅，推埋佢九十二歲媽媽嚟，佢話：『我媽媽已經失憶咗幾年，但係我話畀佢聽，我今日嚟聽馮寶寶分享福音，佢記得你，所以佢要嚟見你呀！參加嗰次之後，我覺得班老人家畀我嘅愛真係好感動，個個見到我仲係好開心，好似當我細路仔咁，令我好溫暖，自我3月份開始傳福音，一件一件事發生，令到我生命好唔同，想起以前啲事，都覺得係好事。當人開始懂得感恩，就係快樂嘅開始。大家知我哋耐唔耐會得到一啲，但係唔識感恩，我哋唔會快樂，識得樣樣去感恩會好快樂，但係咁樣又唔代表唔喊，有開心感觸嘅喊。」
展覽詳情：免費重溫兒戲
「童星‧同戲─五、六十年代香港電影童星」展覽
日期：即日至11月3日
地點：香港西灣河鯉景道50號香港電影資料館
內容：剪輯播放眾童星的經典電影片段及口述歷史訪問，展廳內設有一個配以「昔日香港」插圖為背景的小舞台，台上裝置多位童星的人形紙板公仔。展覽亦設有放映節目，由即日起至9月28日，放映12位童星共30齣電影，展覽供市民免費參觀。
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！