近排基建、建築、環保、水務板塊，全部都表現唔錯，即使早兩日跌市，呢啲行業依然硬淨，原因五個字講完——城鎮化概念。睇番估值，好多都幾高溢價，平則有超過兩倍PB（市賬率），貴則就超過四倍，可以攞到咁高估值，反映基金好buy城鎮化概念。經反覆搜尋後，小弟發現有一隻股份，集合晒基建、環保、水務等行業於一身——翔宇疏浚（871），佢最吸引嘅地方係PB唔夠一倍，只要基金一收齊貨，隨時發力，潛在升幅可以倍計。
走勢呈大圓底待爆上
翔宇嘅業務主要分兩部份，一是疏浚業務：提供基建、填海、維護同環保疏浚服務同相關嘅諮詢服務。二是疏浚相關工程業務：包括小面積土地吹填工程、短期造路工程同土壤壓實。再簡單啲講，翔宇嘅業務主要係喺個海或河度挖泥，挖完又再填。不過中間過程好複雜，涉及好多環保問題，如挖泥時會有好多擴散，所以技術含量好高。根據翔宇嘅年報講，佢哋嘅技術優勢唔錯，包括有多套進口同自產脫水設備、環保清淤船、利用處理後尾水養魚、同處理後污泥種植蔬菜等。淨係睇字面理解，即搞建設之餘，之後嘅剩餘物資如水同泥又可以再用，技術含量咁高，含金量應該都會成正比。
業績方面，舊年翔宇表現平平，首先係上半年因成本增加而令盈利倒退，而下半年則因併購江蘇蛟龍項目啟動及進行收購而令毛利率下跌，全年營業額減15.1%至9.66億元，盈利跌咗34.2%，得1.99億元，其中基建同填海疏浚業務營業額減42.6%至5.34億元，但環保疏浚同水務管理業務營業額則升8.2%，分部業績大升1.6倍至7,050萬元。
至於舊年5月，翔宇以9,640萬元收購江蘇省鹽城市商業用途土地；另喺9月以2.85億元購買一艘絞吸式挖泥船；年底再以承擔負債形式，以代價3.28億元購入鹽城物業；今年3月就以2.53億元減持另一項物業權益，應可視為旗下物業發展換馬行動。所以舊年盈利跌只係一次性，只要今年業績重返2011年水平，即獲利3.03億元，意味每股盈利0.38元，現價2.11元嘅預測市盈率只係5.6倍，相比同類型股如北控水務（371）預測市盈率逾23倍，翔宇吸引得多，如果追到北水一半，翔宇可睇4.37元。市盈率吸引外，翔宇個PB都好吸引，截至舊年底，PB只得0.97倍，相對北水嘅2.67倍，又係差一大截。
雖然翔宇唔係好多基金揸佢，浮面得一間，就係老牌歐資投行羅富齊投資（Edmond de Rothschild Asset），呢間羅富齊都唔失禮，1953年由Edmondde Rothschild創立，總部設喺巴黎，而佢揸翔宇嘅每股成本價講緊係2.267元，高過現價2.11元少少，即係現價買有一定着數。最後又睇圖表，今年造咗個大圓底，如果短線突破到2.2元嘅頸線阻力，量度升幅中短線點都要先見一見2.8元。
陳承龍
本欄逢周四刊登
相戀54年！倪匡向全世界說：「到現在這麼多年，還是這麼深愛太太！」
你都想分享一點甜蜜？立即重溫今周《亂噏24》！
http://bit.ly/appletalk24