阿米打算今年11月跟女友Elly到美國波士頓結婚，但提親真是一個大難題，雙方家長頭一次網上見面，阿米的母親一小時前才剛接受女兒是同性戀的事實，現在又要和親家因婚後生活問題而討價還價起來。
一切都因為英國上月通過同性婚姻法案，本港有團體開始宣揚同性婚姻立法的思潮，受這股革命浪潮衝擊，本港同志界也掀起一股趕結婚的熱潮。
不理世俗眼光容易，但結婚豈只是兩個人的事。阿米一直有勇氣向全世界承認自己性取向，也敢於實踐真愛，但從未夠膽向母親親口承認，怕她無法接受，現在一次過要向母親坦白還要通知婚訊，當中壓力超乎想像，《爽報》直擊整個提親過程。
記者：蕭瑩盈 攝影：胡堅
阿米真的「夠薑」，決定和Elly結婚後即在facebook上打出結婚啟事，朋友看到消息紛紛祝賀。她此時心頭洋溢着喜慶，但一塊大石卻放不下，就是如何告訴母親呢？直至阿米的姑姐在fb得悉她的婚訊，再告知米媽「娶新抱」喜訊時，最難面對這一天終於到了。
如今距離結婚日子只剩三個多月，她向記者坦言仍未有勇氣交待，一直拖着，希望到米已成炊時媽媽不會反面。「對阿媽，我連出櫃都未做呀，寧畀佢知，莫畀佢見，有女友上嚟，都只話係朋友」。
媽媽一直是阿米死穴，除此外她甚麼人都不怕面對。對自己的性取向也非常清晰，訪問時任影任問，連自己拍過25次散拖、七次認真、最痛一次是前女友一腳踏兩船、交歡後女友在床上攬着抱怨她不是男人等等，都巨細無遺和盤托出。「結婚雖然只係一紙婚書，但係一個承諾，只要係真愛，有勇氣、信心，同性戀者都可以開花結果」。23歲在浸會大學唸三年級的阿米，立場堅定，她說挑了今年11月8日女友Elly的生日，在對方所住的美國波士頓共諧連理。
中一「追女仔」遭學校投訴
害怕面對是因為太愛媽媽，阿米的父母很早離婚，米媽向來視獨女如珠如寶。中一時試過收到學校投訴，指阿米喜歡「追女仔」，米媽當時已晴天霹靂，追問女兒是否同性戀者。看見母親惶恐絕望的眼神，她不忍打擊，只得年年耍太極推說「唔知，遲啲再答你」。然而剷青短髮等豪邁舉止瞞得過誰，十多年來兩母女只好「呃呃両両」，見步行步！
這天阿米如實告知婚訊，一天內要接受兩大打擊，雖說心裏有數，但米媽還是不懂得如何面對，扭過頭向記者說，「點解明明係女，長大變咗男仔，両家好似多咗好多lesbian，唔知係咪因為食物、基因影響呢？」多年來她怕得要死，一直裝聾扮啞，「上年聖誕佢去美國，我幾驚佢會做手術，返嚟第一件事睇佢身材有冇變」。她希望女兒是外在因素「搞錯」，還有轉機，但一年一年過去，事實越來越清楚，「佢用行動話比我知，佢係！」
婚訊既是震撼也是解脫，想不到阿米和米媽終解開了死結，大家首次打開天窗說亮話，甚至談起婚禮細節。「你結婚低調啲好，驚你將來條路難行」，甚麼事情都敵不過母愛，她始終不捨得逆女兒意。
女兒要結婚，到底是嫁女還是娶新抱，米媽起初一片混亂，但她後來想清楚沒有失去獨女，便不大情願地彎嘴露出微笑表情，但另一隻手又不安地「摵」着手踭，「盡量接受佢係同性戀者囉，平時都有睇有關資料，以前覺得好騎呢古怪，好彩呢幾年社會開通好多，不過行呢條路始終難，做錯乜嘢，人哋會先入為主，要額外努力補分」。
母親要抱孫 邊個陀B？
正當阿米為媽媽接受而鬆一口氣時，米媽突然提出新的條件，就是無論如何都要「抱孫」，兩母女又為此開始講數，「最緊要畀個孫我湊，可以借種，但要用你粒卵子，你老婆負責陀仔囉，唔好呃我，養大先知唔係你嘅基因，到時難受死」，阿米只得唯唯諾諾，一心過了海就神仙，到時再見招拆招。
殊不知薑是老的辣，米媽說要得對方答應才安心，不識趣的記者多口建議通過FaceTime可與美國親家見面，米媽當然大呼贊成，阿米則顯得誠惶誠恐。
視像電話撥通後，米媽老實不客氣，劈頭一句就試探親家奶奶會否善待阿米，「阿米話你叫佢哋結婚，係咪真係咁開通先呀？Elly爸爸知道未？」貌似蘇杏璇的Elly媽也不是省油的燈，滋油淡定拆招，「咁個人自由，唔傷害其他人，冇問題喎，個女鍾意就得。佢爸爸估到，但未正式同佢講，應該唔反對」。
直路入正題，米媽開口叫Elly親自為阿米懷孕，不能假手於人，Elly皺皺眉說「到時睇環境」，想輕輕把話題支開，米媽卻不輕易放過，繼續連番追問，Elly媽忍不住插嘴幫女兒解圍，「不如等阿米生啦」，氣氛頓時變得僵硬，阿米也嚇得整個人彈起說，「都係Elly生，成件事真crazy」。
話題再轉，米媽問及未來新抱長大經歷，當聽說Elly曾經跟男孩子拍拖，氣氛又再緊張起來，「你以前同過男仔，將來會唔會又鍾意番男仔㗎？」面對未來奶奶質問，Elly斬釘截鐵回答，問題不涉及性取向，「你講嘅係外遇問題，任何夫婦都會遇到」。
15國家容許同性婚姻
說着說着，米媽忽然挺直腰，瞪大眼說：「我係咪要改口叫阿仔呢，呢個係我個女，嗰個又係我新抱，好亂呀」，詎料阿米厲聲反對，「唔得，叫我阿仔好奇怪！」米媽想努力融入女兒的世界，但倉卒之間不知如何處理，結果弄得大家都很尷尬。在一片混亂聲中，首次視像提親會議就此結束。
對於米媽會否去美國做證婚人，兩家還未有機會達成共識，最後米媽以簽證麻煩為由，決定不去美國觀禮。看來爭取一紙婚書只是開始，阿米和Elly婚後的路仍是荊棘滿途。
女同學社幹事鍾智灝表示，現時有15個國家容許同性註冊結婚，隨着越來越多國家承認同性婚姻，本港多了同性戀者計劃結婚，「以前覺得唔係自己嘅事，両家憧憬大啲」。他指家庭壓力仍然是主要阻力，建議同性戀者與家人要多開心見誠溝通，「好似稱呼，有共識就ok。收埋問題只會加深誤會」。
你想爆?幫你爆!
熱線電話：2990 7225
mailto:[email protected]
WhatsApp：9131 4511
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange