曾經在消費行業中具有藍籌般地位的百貨股，近日猶如彗星殞落般，股價連番重挫，深不見底。其中以「昔日王者」百盛（3368）跌勢尤其凶狠，最新業績表現差不特止，仲要連分析員電話會議，都只派出一名臨時CFO撐場，其他管理層好似失咗踪咁，冇蒲頭。咁你叫市場會點諗？
至於現任王者金鷹（3308），有份出席業績會議的投資者亦批評，管理層全程都是在帶大家遊花園，連第三季表現update都唔肯講。所以近日百貨股的跌勢，除了基本因素，仲有不少是信心問題。
有投行近日開始為百貨股估底，已經唔用市盈率計價，而係當佢哋「破產」咁款，齋計佢手持的小量物業去計淨資產值。例如百盛，大概有80多億元物業，每股NAV約2.8至3元左右，相信呢個價會有啲支持。不過海迪想提醒各位，一幢物業的估值，是根據其商業收入及人流去估算，如果檔生意變壞緊，呢個數字仲可以有好多下調空間。想等被併購的機會？相信有排都未到價，無謂同佢鬥長命了。
海迪
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange