市況疲弱，恒指殺落21600點附近略為反彈，但未能收復250日線，走勢仍然惡劣。部份個股縱有反彈，但魏力建議最多炒即日波幅，皆因美國退市前景未明，聯儲局官員一人一句，莫衷一是，完全無定向風，揸重貨過夜好易陪葬。炒股最重要睇值博率，目前牌面睇，完全唔值得博。
揀隻增長勁、可揸中長線的股份，濠賭股銀河娛樂（027）是不俗的選擇。公司中期業績靚仔，遠勝大行預測，收益增長9%至308億元，EBITDA按年增23%至58億元，純利升35%至46億元，創上市新高。截至6月底，集團現金升至181億元，零負債，淨現金達78億元，財政實力強勁。
業績後，大行紛紛唱好兼上調目標價，最樂觀係高盛及美林，齊齊睇50.20元，較現價仍有近兩成水位。
美林指出，雖然銀娛貴賓廳收入按年下降，但中場賭枱收入激增48%，按季亦升12%，帶動整體收入保持高增長。澳門銀河第二期可望如期於2015年上半年開幕，第三及第四期目標於年底或明年年初動工，將為銀娛持續帶來增長動力。
高盛亦預期，澳門銀河第三及四期將包括一個可容納萬人的表演場館，2萬平方米的會展中心，以及5,500間酒店房間，料可於2016至18年落成，增長勢頭可望維持。戰友可待回落至42元附近吸納，先睇50蚊。
魏力
http://www.facebook.com/2012jason
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange