經歷死過翻生、22歲賴楨敏（Jacqueline）帶着新朵「Iron Woman」全力幫香港爭全運第1金！佢會聯同上屆全運1金2銅原班人馬林立信、鄭文傑同埋林子心，出戰下個月2號遼寧全運場地障礙團體賽，出發前，佢哋已獲250萬元贊助同馬會一對一嘅獎金鼓勵，難怪Iron Woman都話：「I am stronger（我比4年前更強）。」
墮馬重創後更堅強
4年前嘅山東全運會，香港7面獎牌中（2金1銀4銅），馬術佔咗3面，當時只得18歲嘅Jacqueline亦有份，不過佢喺11年2月意外墮馬，有半身癱瘓危機；最後冇事，但被壓碎嘅盆骨要嵌13口螺絲同兩塊鐵片入去；噚日喺馬會出席全運記者會時，佢笑容滿面咁話：「我𠵱家體內充滿金屬，所以佢哋叫我Iron Woman，嗰次意外令我變得更強。」
大難不死嘅Jacqueline為減輕港姐媽咪吳夏萍負擔，今年初申請FringeBacker，6月結束時共籌得約48萬善款，佢話會用喺馬匹開支方面。其實4名爭金嘅全運馬術隊亦獲贊助商共250萬港元，以資助賽前訓練，馬會更為佢哋設立全運獎金，金額近乎恒生獎勵金（見附表）一對一，即團體金牌可以攞超過80萬港元獎金。
林立信衞冕冇壓力
上屆全運奪個人賽金牌同團體賽銅牌嘅林立信話：「我哋香港隊嘅優勢，係個個都長年累月喺歐洲訓練同比賽，一直面對國際級選手，而且上屆全運金牌唔會帶畀我壓力，大家可以放心。」今屆共有8支馬術隊參加全運團體賽，港隊有機會喺9月2號爭取金牌。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange