星爺周星馳雖然做咗比高（8220）大股東三年幾，但係佢以比高執行董事身份現身嘅次數，真係一隻手數得晒。比高噚日召開股東會，星爺又係no show，如果有星爺粉絲為見星爺一面而做小股東，真係嘥氣。
好在星爺今次比較識做，專登托另一位執行董事張爾泉，向在場小股東同傳媒講聲對唔住，指星爺忙住睇緊幾個劇本，於是先至無法出席股東會，希望大家見諒喎。
張爾泉隨即變成星爺發言人，透露星爺𠵱家同幾間公司傾緊開戲，暫時唔知邊部會跑出，應該好快有公佈。
《降魔篇》票房收10億
今年初《西遊．降魔篇》票房收逾10億，係咪諗住拍續集先？比高獨董陳周薇薇就話，星爺喺《西遊》放棄幕前，走到幕後，佢最初都估唔到市場反應係點，點知大收旺場。𠵱家星爺手頭上有幾個劇本，的確包括《西遊》續集㗎。
其實拍乜都好，大家最關心係星爺會唔會參與演出，陳周薇薇竟然話，冇星爺演出嘅《西遊》都大賣，以後比高開嘅戲，星爺會繼續做導演，做唔做幕前，就要睇佢自己到時決定。
對於比高小股東嚟講，最緊要星爺推出嘅戲收得，佢係咪親身上陣都冇乜所謂，不過佢咁耐冇演，如果有份參演，當然可以大收宣傳之效，刺激票房，星爺不防諗諗佢啦。
李華華
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange