八方張工作枱經常立立亂，藉口當然係亂中有序啦！估唔到畫《風雲》同《中華英雄》嘅漫畫大師馬榮成都一樣。早前宣佈唔再以畫漫畫賺錢嘅馬sir話，自己工作室只得一個特色，就係夠亂，手稿同最常用嘅畫筆放到一枱都係，咁先啱feel。有時清潔嬸嬸幫佢執枱，將啲筆放番晒入筆筒，馬sir即刻頭都大埋，話有排搵唔番支筆喎。
呈現漫畫家日夜顛倒生活
今日開始喺動漫基地搞嘅《馬榮成漫畫作品展》，複製馬sir「戰鬥房」，連馬sir都話同出道初期間房八成似，有齊生活所需，呈現漫畫家日夜顛倒、隨時瞓office嘅生活。至於嗰少少不完美之處，咪就係現實中更亂囉！
呢間「戰鬥房」除咗有極霸氣嘅鎮房之寶，兩米高手繪《風雲》名劍「巨闕」，竟然仲放咗隻1978年《油脂》黑膠唱片，同𠵱家冇乜人用嘅CD機。鍾意聽歌嘅馬sir話至愛係《假如愛有天意》，閒時仲會邊畫邊嘆茶。亂成咁，唔怕嚇窒想入行嘅後輩咩？馬sir話要畀後生仔有定心理準備，如果咁都頂唔順，唔好入行喇！
展覽係灣仔動漫基地開幕後第一炮，當然唔止工作間咁少嘢睇；Q版馬sir模型、《中華英雄》封面同《風雲》角色Figure等統統冇走雞，仲有大批手稿輪流展出。入場免費獲贈限量《風雲》明信片。
馬榮成漫畫作品展詳情
日期：8月22日至10月20日
時間：上午10時至晚上8時；逢星期一休息
地點：灣仔茂蘿街7號動漫基地二樓至四樓
備註：免費入場；入場人士可獲贈限量《風雲》明信片，每周一款，先到先得。
資料來源：動漫基地
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange