講開《西遊．降魔篇》，不得不提有份發行嘅A股華誼兄弟，華誼喺內地出品唔少賣座電影，今年股價長升長有，至今已炒高1.8倍，搞到董事長兼大股東王忠軍近日兩度減持，套現4億人仔，盡享贏錢快感。
大股東兩度減持
王忠軍上周五同本周二分兩日沽華誼，減持後，持股量仍有24.32%，雖然唔影響大股東地位，但為免投資者睇淡，公司秘書早前急急腳舉行電話會議，強調王忠軍減持係為咗投資新項目，日後可能注番入華誼。
被問到點解公司上半年藝人業務收入跌時，秘書解釋話因為旗下藝人、《非誠勿擾II》女主角之一嘅姚晨去咗安胎，公司少咗條財路。姚晨早排接受訪問時自爆，生完仔之後好開心，唔趕住復出拍戲，不過華誼點會放過呢隻會生金蛋嘅鵝，股價應該頂得住地心吸力。
相戀54年！倪匡向全世界說：「到現在這麼多年，還是這麼深愛太太！」
你都想分享一點甜蜜？立即重溫今周《亂噏24》！
http://bit.ly/appletalk24