新興市場股市喘穩，港股雖仍跌152點，但較低位彈起約200點，大市成交減少至550億元左右，強勢板塊如科網股及濠賭股繼續有資金追捧，大市隨時又再進入炒股不炒市階段。另一類可吼實嘅係績優股，有盈利支持買都買得安心啲，曾於本月初推介嘅澳門餐飲股佳景集團（703），中期業績靚爆鏡，噚日炒高9.2%，短線炒作目標2.36元，半個月meet到。盈利交到數，可set中線目標價3.04元，潛在升幅28%。
截至6月底止半年，佳景營業額3.45億銀，增長9.3%；錄得盈利8,654萬銀，按年增長43%，去年下半年賣舖入賬1.25億銀，撇除有關收益，盈利按半年計更升53%。最吸引之處在於派息大增，期內中期息按年勁升67%至2.5仙，年度化息率雖僅2厘，但卻成為吸引基金入股嘅殺手鐗。除餐飲業外，佳景更成功染指澳門食物手信業務，早前宣佈以390萬銀收購澳門英記餅家商標及業務牌照，自製遊客至愛嘅杏仁餅、蛋卷及牛肉乾等。
佳景現價年度化市盈率8.6倍，較同業翠華（1314）嘅40倍，大幅折讓近八成，估值平到笑，係咁易炒番上11倍，可見3.04元，潛在升幅28%
唐牛
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange