喺《蘋果》重出江湖，多謝主編邀請，仲要多謝我媒體經理人風哥仔！都係嗰句，一係唔寫，一寫就要畀心機寫。以報各位支持！
欄名叫「Pro J財技特訓班」，一睇都知我想講乜，呢個方向亦都係我嘅心願，將財經知識普及化，令到更加多朋友喺股海嘅波濤洶湧下，繼續伴我啟航。
阿媽華晨拖數23億
年初，由華晨（1114）分拆出來嘅汽車引擎的新晨動力（1148），獲寶馬授權製造N20引擎，2014年6月開波，令股價由3月上市以嚟，大升約五成！大佬，寶馬授權加最新引擎，淨係呢九個字都夠照，係咪？但回歸基本，第一份中期業績收入同毛利都倒退，確係要好好研究吓：
（一）毛利跌，因為毛利率「較低」容量少過1.6升氣油引擎銷售佔整體銷售比重增加（1.6升引擎毛利率唔夠12%），呢個結構性問題，可以用管理學BCG Model去解釋，現金牛開始老化，新業務又追唔上發展步伐。
（二）最大隱憂，係來自應收賬，新晨動力分咗兩項，一項係應收賬，另一項係應收關連公司款項（直接啲講：阿媽華晨拖仔數）。計一計，去到6月底超過18億人仔（約22.5億港元），按年升兩成半，呢個數多過半年營業額，差唔多等於成間公司市值一半，都咪話唔誇張！
最堅嘅係，六成都係同「關連公司」有關，阿媽過期未找數比例，由09年27%，到今年去到50%。講真，阿媽唔找數，阿仔焗住頂，呢個係家事，但係如果放喺一間上市公司，對股市微塵──小投資者，又唔係咁好。不過，我一向喜歡「逆向思維」，會唔會阿媽見阿仔頂得咁鬼辛苦，一嘢幫阿仔清數，為佢阿仔重新更有自信踏上上升通道。
徐燦傑
中國銀河國際財富管理主管
本欄逢周三刊出
相戀54年！倪匡向全世界說：「到現在這麼多年，還是這麼深愛太太！」
你都想分享一點甜蜜？立即重溫今周《亂噏24》！
http://bit.ly/appletalk24