已經N年冇開電視劇嘅亞視，月前曾經話過今年想開劇。原來亞視今次唔係齋吹水，佢哋真係同緊內地單位傾合作，翻拍徐少強79年幫亞視前身麗的電視主演嘅經典劇《天蠶變》，仲打算搵徐少強同雪梨生嘅仔徐偉棟主演，扮番佢老竇當年雲飛揚個角色，聽落都幾有噱頭。
邀楊恭如出山
噚日向亞視高級副總裁葉家寶求證，佢承認翻拍《天蠶變》，佢話：「今年影視博覽有內地製作人睇到亞視有好多經典劇想重拍，特別係《天蠶變》好感興趣，我哋會兩邊合作，內地取景，劇本會根據原來劇本作少少修訂，兩地派演員參與。有製作人就建議搵徐少強個仔做雲飛揚。」葉家寶話女演員方面有意搵亞姐出身嘅楊恭如同許瑩喎。
當年《天蠶變》除咗徐少強之外，仲有苗可秀、馬敏兒、余安安同伍衛國主演，呢部60集長劇當年一出街已經好受歡迎，徐少強更加憑呢部劇一炮而紅。
但亦因為徐少強爆紅，好多電影公司搵佢開戲，佢竟然喺《天蠶變》邊拍邊出街期間玩失蹤，搞到麗的一鑊泡，結果換咗顧冠忠頂替佢個角色，話雲飛揚練成天蠶神功之後，破繭而出容貌大變，由徐少強變成顧冠忠，呢件事喺當年娛圈真係好轟動。
版主：陳基征
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！