英超首周完成，除阿仙奴輸波，戰果大致正路，最令我跌眼鏡的為曼聯一仗，非因賽前多方睇淡曼聯而最終大勝，而是朗尼（紅衫）竟然落場。這類「待售」球員正路處理手法是像加里夫巴利，稱傷缺陣，但可能上周朗尼已為英軍出戰，無理由再「屈」他受傷；但見朗尼後備入替前與莫耶斯密密斟；落場後都算走動落力，還交出助攻給韋碧克埋齋，成個勢好似：關係又唔似好差喎？到底朗尼嬲爆跟朋友說「過硬車仔」是真；還是莫耶斯所講「我哋全隊都好幸福喎！」先至真？真係正如林欣彤新歌歌詞：似是而非。看來謎底只有9月2日轉會窗關閉才揭盅。
另外一樣稍跌眼鏡的是3支英超升班馬的表現。雖然3隊齊齊輸波，但擴軍乏力的水晶宮及侯城分別僅負強隊熱刺及車仔0:1和0:2；而擴軍最勁、豪花2,500萬鎊的卡迪夫城，對着中型班韋斯咸卻毫無還擊之力地淨吞兩蛋。卡城未來4場聯賽會先後對曼城、愛華頓及熱刺，榜尾位置似正向他們招手。
還可跌眼鏡的，是首周10場比賽竟有林柏特、賓迪基及約拿芬禾達斯3人射失12碼，這亦代表門將準備充足；開鑼日負責操刀，始終有點壓力，多數射手都會選擇自己最有把握的位置。以史篤城的禾達斯為例，統計顯示他近5個12碼4次射向門將右下角，結果做足功課的米洛列特二話不說就撲向右方，為紅軍保住勝局，相信絕非符碌。文：方柏翹
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange