TVB劇集最愛玩尋親橋段，好似《衝上雲霄II》咁，之前已有岑麗香同佢劇中明星阿媽呂珊相認，香香演得唔錯。到昨晚那集就講飾演胡娉/Pink Pink嘅朱晨麗，同生父景家駿（單立文飾）相認。
話說Pink Pink同詹子麟/Jim Jim（羅仲謙飾）一齊去咗三亞拍廣告，務求塑造佢兩個成為體壇金童玉女，而景先生同Pink Pink媽咪Head姐（江美儀飾）都有同行。
Pink Pink喺沙灘輕舞，而朱晨麗本身有跳舞底子，呢場戲對佢嚟講駕輕就熟；至於Jim Jim就裸上身落水拍攝，謙謙身形雖然未回復巔峰狀態，但好彩佢嘅巨胸仍在，迷倒唔少粉絲。
身為景先生親生女嘅Pink Pink，寫咗張咭兼送紮花畀老竇，諗住嚟個父女相見，點知景先生只敢遠遠偷望，冇立即應約，Pink Pink一怒之下話唔拍廣告，仲着住件低胸睡衣跑落沙灘，兼且落水，表現好激動。
呢個時候，Head姐同景先生趕到沙灘時，見到Pink Pink隻鞋，以為佢做傻事，景先生二話不說就衝落水尋女，最後點？梗係冇事啦，兩父女終於相認，不過景先生就閃親條腰，Pink Pink就幫老竇捽藥酒。
至於Jim Jim就被凌卓芝/CoCo（胡定欣飾）以為佢亂唱懷孕一事，搞到兩人面左左，後來先知原來係兩位Jim Jim粉絲喺網上散播謠言，仲鬧CoCo係八婆，CoCo先知一直錯怪Jim Jim，而飾演兩個粉絲嘅臨時演員，竟然成為網民熱話，指佢哋騎呢喎
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！