前年離開無綫向外闖嘅佘詩曼，身價暴升，話都冇咁快佢同之前嘅經理人公司約滿咗，之前傳英皇、內地嘅華誼，仲有無綫同內地公司合作組成嘅TVBC都爭人，華誼仲開到八千萬嚟搶。不過據知阿佘已經決定咗食邊家茶禮，終於因為做生不如做熟，揀咗簽TVBC，阿佘將會強勢回歸無綫！
助無綫吸金
話就話係返無綫，但阿佘身價唔同晒，有傳佢五千萬簽TVBC，咁貴梗係唔會只係幫無綫拍劇啦，阿佘回歸後主力都係內地市場，幫公司搵大錢，據知佢係俾TVBC嘅誠意打動，覺得做生不如做熟，而且一年會幫無綫拍番一個劇，嚟緊明年1月就會拍曾志偉監製、梁家輝回巢嗰齣劇。
至於TVBC用咁多錢簽阿佘返嚟，係因為呢間公司喺內地始終係新，需要陸續簽人，所以簽啲大卡士返去做生招牌，吸引更多有卡士嘅藝人加盟。無綫製作資源部總監樂易玲噚日喺電話度話：「暫時唔方便透露，適當嘅時候就會公佈。」
撰文：馮仁昭
相戀54年！倪匡向全世界說：「到現在這麼多年，還是這麼深愛太太！」
你都想分享一點甜蜜？立即重溫今周《亂噏24》！
http://bit.ly/appletalk24