香港近年政治亂局，源自一套錯誤嘅執政理論。大家點解認為殖民地時代及公務員更可信，亦因為英國佬高招，一直將香港去政治化，將政府打扮成超然於黨派政治及意識形態之上嘅honest broker。
邵善波上立法會公開表示政府要打輿論戰，要反擊，理論上似乎言之成理，天水圍地區show內689對泛民作強硬反擊，亦係邵善波理論體現，何解中產主流民意有如此大反響，莫非689特別乞人憎，所以受特別針對？
原因不在689，而係呢套理論有根本性缺陷，執政概念表面合理，但實際喺香港並不可行，在內地、台灣、新加坡可行，但在香港不可行。689視新加坡為學習對象，當地執政人民行動黨PAP一樣打輿論戰，親疏有別分配政治資源，將反對派邊緣化。
但PAP假假地都係經過大選上台，內閣閣員要有選區服務歷練，而其核心執政綱領，除國家民族主義外，也要有delivery能力，以精英提升管治水平，用績效換取群眾支持。香港建立執政政治集團最大缺失係冇民意授權過程，689上台乃一場北京操盤嘅選舉，香港人睇得好清楚。
而北京設計嘅行政主導體制，排斥政黨政治，特首選舉法禁止候選人有政黨背景，於是香港只能建立一套古靈精怪山寨式執政集團，甩甩漏漏，毫無政治力量，所謂同泛民角力，根本得啖笑。
問責內閣全部雜牌軍
在呢套華強北山寨版iPhone政治體制下，作業系統經常有bugs，問責內閣由不同山頭雜牌軍組成，有啲甚至來歷不明、政見不明，如何磨合成有戰鬥力團隊？如果可以，傑志都可以擊敗曼聯！結果真正有政治力嘅唔係特區政府，而係中聯辦地區系統，由佢哋幕後支持政府，但由於一國兩制不能完全抓爛面不顧，所以又唔能夠大鑼大鼓出櫃，公然走上台前。
而呢個政治系統冇合法性、認受性，所以就出現咗天水圍落區鬧劇，一大班古靈精怪人士在場外挺梁，而佢則在場內高調作政治反擊，配合得天衣無縫，但就俾全港鬧爆。
要實現專業執政，只有由政黨通過普選，核心執政綱領得到民意授權下上台執政，咁先至有足夠政治能量同反對派角力。
689半桶水，知啲又唔知啲，硬套執政黨概念，造成建制內外及社會分化，後果嚴重，山寨iPhone電池會爆炸、會漏電，仲有可能電瓜人！
添馬男
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange