唔到你唔信邪，港股七月十四「走鬼」！魏力昨文提醒戰友短線將有調整，加上恒指並非大裂口低開，而中途仍見唔少買盤力頂，走貨時間其實頗充裕。如未有及時沽貨，今日亦宜盡量減持，保留實力。
美國退市如箭在弦，債息近月抽升，觸發資金撤離亞洲，印尼盾及印度盧比近日急劇貶值，加上強國水緊，多個負面因素下，亞太區爆發小股災，恒指一棍跌穿10日及20日線，距離牛熊線僅100點，MACD將轉為熊差，走勢是極似5月中的情況。短線睇幾多？21300至21700點為牛證重貨區，相信殺落去的機會甚高。
有戰友疑惑道：「阿爺救市保增長，經濟不是應該會好嗎，為何股市仍會跌？」無錯，PMI的確回穩，GDP亦能保七，但「四萬億」後遺症──產能過剩問題非一時三刻能解決，復蘇可謂荊棘滿途。此外，中央救市方程式得一條，就係靠投資谷增長，靠炒貴地皮賺錢還債，百貨、服裝等消費行業不振，就算復蘇都屬虛火，實體經濟根本未掂。
中資股而言，鋼鐵及水泥算是整合較快的行業。中央全力推動城鎮化，內房及鐵路基建股較穩陣，中鐵（390）、中國南車（1766）走勢尚佳，起碼買咗唔使成日走鬼。想進取可揀中國智能交通（1900），昨逆市爆升7.4%，突破2蚊水平，成交較上日高達9倍，動力澎湃，可以小注跟進，失守1.90元止蝕。
魏力
http://www.facebook.com/2012jason
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange