「富豪飯堂」福臨門今年初解決股權糾紛，「五哥」徐沛鈞畀錢「七哥」徐維均，得以繼續執掌港九福臨門，七哥則決定另起爐灶，喺灣仔杜老誌道群策大廈租落3層樓面，開「家全七福」（Seventh Son Restaurant），計劃本周五試業，9月12號正式開業。
格局似曾相識
華華噚日中午走上去家全七福，睇佢裝修成點，見到室內裝修得八八九九，枱椅齊全，只差未鋪上枱布。室內以米黃、米白色為主，感覺開揚舒服。雖然未開張做生意，但見樓面員工，無論男女都着好制服，如果話係為試業做準備，都算相當專業。
老闆七哥咁啱亦在場同兩位朋友食晏，順便試菜。佢話，家全七福請咗大約60人，包括寫字樓、樓面、廚房員工，大廚由深圳同日本嘅福臨門調嚟。福臨門多年嚟訓練唔少大廚，佢話唔使撬走港九福臨門嘅大廚。加上佢14歲起跟阿爸徐福全學廚，喺福臨門工作50年，要睇實食物嘅質素應該冇難度。
家全七福嘅格局跟福臨門亦有幾分相似，4樓係寫字樓同廚房，樓上兩層做生意，5樓做散客，6樓就設有貴賓房。灣仔福臨門都係2樓做散客，3樓設貴賓房，華置（127）主席劉鑾雄幫襯灣仔福臨門，一般都喺3樓開餐。
至於家全七福將會提供乜嘢特別菜色，跟福臨門爭一日之長短，七哥就大賣關子，暫時唔透露。
李華華
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange