亞洲足協早前通過擴大亞冠盃規模，希望多啲球會可以參與呢項頂級亞洲球會賽，早前仲去信香港足總，邀請近屆曾經出戰亞協盃嘅南華同傑志接受考核，如符合亞冠盃嘅參賽要求，南、傑可以升呢踢亞冠盃外圍賽。
亞協派員來港視察
傑志總領隊伍健前日喺fb透露，傑志係其中一支獲邀球隊；求大俠收到風，另一本地老牌球會南華其實都有份。噚日問過伍生，佢話亞洲足協下星期會派員嚟香港考察傑志，除咗睇場地，亦會了解佢哋近季本地賽事嘅入場人數、青訓工作同長遠發展方向等資料，所以佢近期就忙於整理文件：「如果考牌成功，就有資格踢亞冠盃；至於幾時可以踢，亞協冇講明，所以唔清楚。」
雖然南華幾年前喺亞協盃殺入4強，傑志今年都首次殺入半準決賽，不過講到球賽水平，港甲喺亞洲只算二線，同日聯、韓職仲有一大段距離，就算通過外圍賽入到分組賽，都隨時被大炒，所以有份踢亞冠盃真係禍福難料。伍健好樂觀咁話，未試過就唔好咁快下定論，近年港甲都開始有進步，呢刻最重要係考到牌先喎。
另外，南華同傑志前日喺泰國繼續約戰泰超球隊，結果齊齊和波收場，南華1:1和蒙通聯，傑志就2:2和BEC。睇番泰超目前有武里南聯殺入亞冠盃8強，南、傑能夠友賽和泰超球隊，角逐亞冠盃都算有啲機會啩。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange