前兩日出面仲講緊資金流入中港股，跟手噚日就變成新興市場走資，玩咩！雖然話印度盧比破底已經係好一排嘅事，但先前見到港股升得咁過癮，完全冇理到印度情況，就以為冇乜影響，殊不知噚日先嚟話關事，然後一棍過大跌。
大市波動，以防俾大戶玩謝，短線樂觀定悲觀都唔好放得太大，唔好轉view得太快。美股道指噚晚開市前9RSI剩番18.6，股市短線大跌值博率唔算高，唔使太趕住清貨然後反手造淡，大可觀察多幾日。
講完安撫好友情緒嘅說話之後，又再睇吓啲中期業績，華能新能源（958）係晉佳之前嘅舊愛，啱啱派咗成績表，佢盤數如預期般靚，半年多賺1.6倍至6.46億元（人民幣．下同），每股盈利7.65分，年度化市盈率大約13.5倍。
負債沉重影響盈利
華能新能源上半年發電量按年增長53.5%，之前棄電問題最嚴重嘅內蒙，發電量增76.5%，成為「爆數」原因之一，呢個利好因素早已經喺首季營運數據睇得到，今次業績叫做體現番之前亮麗數據，唔算十分大嘅驚喜，未至於令股價出現re-rate。
事實上，未來風電行業嘅發電量增長可測性相當高，原因供應過剩產生嘅棄電問題持續改善，同時又可以喺供應冇過剩嘅地區建設新產能，未來兩、三年嘅收入增長應該靠得住。
如果要論缺點，華能新能源盈利爆升嘅其中一項最關鍵因素，亦係間公司最魔鬼嘅地方，就係負債相當高，扣除現金後嘅淨資產負債比率達到200%，根本係資不抵債，純屬要靠阿媽華能集團個大名照住，先至能夠屹立不倒。
本身公司嘅上半年收入、經營溢利都係增長六成左右，但係融資成本只上升三成之下，令到公司槓桿增加，純利就可以加速增長1.6倍。
債重當然唔係好事，佢上半年財務費用淨額9.46億元，仲多過純利，加息環境就對佢相當不利，隨時會侵蝕大部份利潤。華能新能源未來收入、經營溢利增長，能唔能夠抵銷融資成本升幅，將會係盈利增長關鍵，預測13.5倍市盈率左右，估值算合理，可分段候低吸持有。
後記：本身晉佳唔多信亞太金融危機會嚴重得去邊，皆因件事發酵幾日，港股先嚟跌，亞太區主要股市亦唔係全線大跌，算係乜嘢危機？所以晉佳唔會將呢單嘢放得太大。不過，喺寫呢篇文寫到呢個位嘅時候，有個基金界老友WhatsApp晉佳，話估計今晚美國聯儲局會議紀錄公佈後，環球股市可能會大跌，當時晉佳窒咗一窒，望番如果港股嚟緊大跌，晉佳呢個預測豈不是變唔靈？所以諗諗吓，就將呢部份嘅預測變成後記，請各位見諒。
晉佳
本欄逢周三刊登
相戀54年！倪匡向全世界說：「到現在這麼多年，還是這麼深愛太太！」
你都想分享一點甜蜜？立即重溫今周《亂噏24》！
http://bit.ly/appletalk24