以後「一周兩件」逢周二及周五見報，兩日各主打一件爆升潛質股，本周第一件先嚟松景科技（1079），有潛質起碼翻一番。
呢期市場熱炒科技嘢及創業板，松景係創業板元老級股份，1999年上市，2010年先升格跳去主板。
松景主打自家品牌「XFX」顯示卡，以及「AviiQ」數碼移動配件等科技相關產品，已經食正晒呢期資金熱炒concept。
食正科技潮 成交異動
松景99年上市價1.5元，最高在當年11月見2.8元，現價（0.149元）自高位累積跌咗95%，貼近08海嘯價，市值得番1.3億銀。同前身係恒力嘅萬達商業地產（169）一樣，靜到冇人吼。
不過，萬達獲相中，成為內房殼股，半年飛升12倍，家陣市值過百億銀。松景絕對有殼嘅潛質。
就算排除呢個可能，松景NAV 0.61元，現價超級大幅折讓76%。科技嘢呢期炒到甩轆，松景仲有咁大折讓，真係流晒口水。
再講，松景13年半年度已經虧轉盈，管理層更加預期，隨住Windows 8推出，下半年財政年度，顯示卡業務好轉，對全年度盈利能力抱樂觀態度。嚟緊日子，兼有得炒盈喜。
今個8月，只係過咗一半，但松景呢個月暫時累積成交，已經貼近1億股，創出集團喺07年港股喪炒期後，六年嚟最高成交的月份。股價未郁，成交先嚟料，聞到飯香。
買松景，翻一番到0.3元，到時PB 0.5倍，仲係好吸引；又如果松景上番2010年高位0.4元，要升1.7倍，PB低企1倍樓下。
錢雋
細價股專家
本欄逢周二、五刊出
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange