面膜股美即（1633）幾個星期前曾傳出斬倉疑雲，仲停埋牌；點知最後揭盅，原來係被全球化妝品品牌一哥L'Oréal睇中，以溢價25%、總代價65億元提出全購。呢個價相等於今年度預測市盈率26、27倍，絕對稱不上便宜。
香港消費者唔多熟悉美即品牌（唯一印象可能係劉央曾經講過佢有敷美即面膜，仲盛讚佢好過SK-II），但原來美即內地市佔率是no.1，由2010年上市時的15%，升到現時已經逾25%。美即的面膜幾蚊就有一塊，主打女學生市場，不過聞說當學生畢業出來工作，變身OL時，就會trade up買其他牌子。年前曾經去過美即廠房的朋友仔就講，其實間廠都幾hea，幾個大桶在煮精華液，工人用手去摺面膜，用腳踩方式去泵精華液上塊面膜到，操作簡單到暈，無乜技術含量可言。
所以簡單來說，美即只是一隻主打靠marketing搵食的產品，要投放大量資金去做廣告宣傳谷生意，近年有關開支急升，已開始傷害到業績表現。面對市場競爭日益劇烈，美即去到呢個位，很可能已經係極限。
喺呢個時候，俾L'Oréal收購，啲股東都算是還得神落了。
海迪
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange