麗新系大股東林建岳真係有意喺政經界大展拳腳喎，政界佢大力支持經民聯，財經界佢就係咁搵猛人坐鎮上市公司。繼舊年從思捷（330）挖走周福安，近日再從高盛搵來負責中國併購嘅葉采得（CT），任麗新製衣國際（191）行政總裁（CEO）。
效力過小小超
葉采得現年39歲，加盟高盛之前，幫過李澤楷打工，喺電盈（008）做創投與併購部副總裁，幫得小小超打工，佢嘅工作能力不容置疑。聽聞佢做投行賓架期間，負責過小肥羊私有化、五礦資源（1208）收購母公司旗下澳洲資產等大刁。咁嘅成績，難怪岳少肯拎780萬年薪羅致佢做麗新製衣CEO。
不過咁，麗國係麗新系嘅控股公司，簡單講，呢間公司係冇乜實質業務，主要在港有幾幢物業收租。根據公司年報披露，截至舊年1月底止，麗國只得20名員工，斷估岳少唔會用1球美金請個人返去，大才小用啩？
麗國份通告講明，CT除咗年薪，仲有酌情花紅，花紅會按業績、新投資嘅溢利等因素釐定，乜嘢係新投資呢？通告就冇講，似在暗示將有新投資。可惜市場暫時冇乜反應，公司噚日中午出通告，隻股都冇乜交投。唔知係咪因為岳少舊年重金搵來周福安加盟，坐喺麗新系4間上市公司董事局，刺激全系股價爆升一輪，之後就無以為繼，投資者今次要睇真啲先呢？
李華華
mailto:[email protected]
相戀54年！倪匡向全世界說：「到現在這麼多年，還是這麼深愛太太！」
你都想分享一點甜蜜？立即重溫今周《亂噏24》！
http://bit.ly/appletalk24