火箭控衞林書豪周日同隊友柏臣斯，一齊喺台灣舉辦籃球訓練營，教一班年輕人打籃球，仲表演埋比賽前會做嘅「功夫」打氣儀式。林瘋喺訓練營話，好想同周一就會抵台嘅新隊友懷特侯活，一齊食個飯或者練波，唔知到時會唔會講新賽前儀式呢？
林瘋近呢幾年返台灣都會搞訓練營，上年請到勇士舊隊友大衛里爾一齊教波；今年林瘋助教一職，就由火箭隊友兼老友柏臣斯頂替。林老師教波出名認真，但都不忘叫一班學員要享受打波嘅樂趣。喺開始練波前，佢同柏臣斯一齊，表演上季火箭賽前同夏登一齊必做嘅打氣儀式；由於夏登唔在場，所以就叫咗一位工作人員幫手代替鬍鬚佬。
林瘋同柏臣斯兩人老友鬼鬼，所以成日俾人笑「基味濃」，搞到柏臣斯勁唔好意思，好老尷咁澄清自己「已經有女朋友」，仲話隊友之間互相扶持好正常。柏臣斯做完助教之後，傍晚時份仲去咗台北新生橋底籃球場，出席NBA台北賽嘅熱身活動，玩得好開心亦大讚台灣打街波班人好好波。
林書豪想同侯活撐枱腳
今季加盟火箭嘅中鋒「超人」懷特侯活，現時亦都喺亞洲出席商業活動；周日喺南韓首爾嘅超人，第二日就會飛到台灣，林瘋就話想同新隊友見面，希望可以一齊練波，或者出街食飯咁，不過現時未有安排。台灣呢排好似變咗NBA球星聚腳地，林瘋、柏臣斯同熱火「鳥人」基斯安達臣現時都喺台灣，懷特侯活嚟埋，球迷真係唔知追邊個好。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange