歐洲聯賽頂級嘅足球員，講緊年薪都起碼幾百萬歐元；佢哋拎咁高人工，除咗好波之外，都要得到球迷歡心。AC米蘭前鋒巴洛迪利就唔係好識做，上周四去瑞士夜蒲，因為唔幫球迷簽名，佢架法拉利跑車就畀廁紙包到好似木乃伊咁。
「巴神」巴洛迪利因為有傷，上周中退出意大利國家隊大軍，唔使友賽阿根廷，意甲又未開咧，咁得閒就梗係去蒲，上周四就揸住佢架法拉利F450戰車，由米蘭去到瑞士盧加諾諗住玩番晚。
瑞士夜蒲闖禍
好似巴神呢啲咁出色嘅男人，無論去到咩地方，都好似漆黑中嘅螢火蟲一樣，咁鮮明，咁出眾，就算去到瑞士一樣有球迷，佢哋仲向巴神索取簽名同合照㖭。或者巴神太喜愛夜蒲，拒絕咗一班球迷要求，急急腳走入夜店，幾個鐘頭之後蒲完拎車，不幸嘅事件就出現，佢架法拉利就畀廁紙包住，好聽啲就好似生日禮物咁，難聽啲即係當巴神嘅愛車係木乃伊，再衰啲就當係……便便！
有望復出戰歐聯附
講起呢架F450，其實都有段古，話說今年5月，有傳巴神同女友芬妮甩拖，巴神先用25萬歐元（約257萬港元）買呢架車，作為治情傷禮物，點知巴神又同芬妮翻撻，之前洲際國家盃，芬妮仲專登飛到巴西支持巴神㖭；或者巴神覺得呢件治情傷禮物用唔着，想利用球迷嘅怒火，借啲意消滅佢啩？
過咗23歲生日嘅巴神，就似乎收咗火，俾人大整蠱都冇搞事，不過事件俾瑞士當地電視台報道，先至傳到街知巷聞。巴神亦都冇受事件影響，上周六AC米蘭友賽丁組仔Dethona，以11:0大勝，膝傷好番嘅巴神仲攻入兩球，好大機會趕得切復出，參加周二作客荷甲燕豪芬嘅歐聯附加賽首回合。
相戀54年！倪匡向全世界說：「到現在這麼多年，還是這麼深愛太太！」
你都想分享一點甜蜜？立即重溫今周《亂噏24》！
http://bit.ly/appletalk24