清理報紙堆，發覺積壓咗好幾封讀者電郵（按：全部由蘋果轉來，秘書打印出嚟俾左丁山睇，唔似得啲賓架咁，由朝到晚睇住黑莓讀電郵），幾位讀者要求答覆，姑且試吓。
一位讀者9S似乎谷到爆，來郵講──
「我真係頂唔蒲香港的吵鬧啦，只想你為我地香港人再三重申一下：
香港的核心價值：『資本主義價值觀』。
資本主義的特點就是遊戲規則是公平的，人人平等的，沒有特權階級，如果任何人有錯就去法院告他，如果他沒給法院判罪，那他就不是壞人，沒有犯法違法的人就沒有罪，不應受到攻擊，社會要保護沒有犯罪的人和他的私產。絕不可以因為你賺多我賺少，我就要求『公平』，要分你的。
共產主義就不同了，非平等的，有特權階級，號召一群人齊聲說你有罪你就有罪，只要你意見和大眾不同就是罪，『只要你多，我少，你就錯』，罪名等同『莫須有』，不站在我這邊的人就是敵人，要打倒，這是多麼的可怕。」
左丁山素來擁護資本主義，反對共產主義，不過香港目前有一股仇富、鬥地主之歪風慢慢形成，可怕也。
讀者梁先生話佢17歲開始睇「GG細語」，今日24歲咯，已讀完大學，做咗兩年海事保險，現在奧地利一間大學收佢讀管理學碩士，規定要學俄文、意大利文、問左丁山好唔好？當然贊成啦，香港學生難得有機會學俄文、意大利文、奧地利又講德文，讀者梁最好全部學齊，包保有前途，26歲27歲先至回港再搵工，唔遲吖，到時難保冇歐洲公司請你做中國貿易代表㗎，駛乜搵特區政府工箒，闖蕩歐洲，即刻起行。
有幾位讀者睇完「到日本買樓」一文，好有興趣，話要到東京、京都日本睇樓，請左丁山介紹地產代理。與外匯專家Ｔ講起，佢話有幾位客戶買咗京都住宅單位，向佢徵詢借日圓按揭貸款嘅意見，咦，到日本買樓，漸成風氣咯噃，啲國際經紀行如CBRE、Jones Lang LaSalle之流，相信好快就快有專人推介。肥仔Ｋ告知，佢有兩個同學畢業後加入東京地產中介公司（即地產代理），可向佢地查詢。但回心一諗，大凡介紹代理、律師、醫生呢回事，如果一切順利就話冇問題箒，若果在交易過程中出事，會唔會埋怨媒人呀？諗諗吓，唔敢制，請各位讀者自己辦理可也。