噚晚集《星夢傳奇》繼續由星夢隊火併巨聲幫，結果星夢隊仍以10分之差落敗，而遭淘汰一位係無綫娛樂新聞主播林子博。而星夢隊今集請來王祖藍做外援，出過唱片嘅祖藍獻唱《To where you are》，而同王祖藍惡鬥嘅係胡鴻鈞，胡鴻鈞唱《征服》，雖然胡鴻鈞走咗一粒音，但四位評判肥媽﹑恭碩良（Jun）﹑倫永亮及陳奐仁都畀佢高分，平均有90分以上，表現超班。
而祖藍獻唱前，就笑言今次參賽主要係畀人插，佢仲鬧着玩話：「驚驚﹗驚驚﹗」
至於祖藍唱完後，評判對佢評價亦甚高，Jun話睇佢男扮女棟篤笑好出色，話佢聲線適合唱歌劇，又讚佢唱得好投入，仲話敬重佢揀一首咁高難度嘅歌；肥媽就話聽到毛管戙，仲話若然祖藍再加多啲感情，絕對可以令人流淚。而陳奐仁就畀祖藍86分，佢笑笑口話：「成日笑我廣東話，0依家笑返你啲英文。」不過陳奐仁將副歌錯講成「福」歌。
除咗王祖藍及胡鴻鈞係今集焦點外，林欣彤（Mag）及王君馨嘅對決亦係焦點之一，Mag唱林憶蓮《沒有你還是愛你》，其實只能算唱得平穩，冇乜驚喜，始終係憶蓮唱得好好多，不過身為憶蓮男友兼評判之一的恭碩良，就畀Mag有85分，仲話好鍾意佢performance，不過仍然聽到失準位，就係忘詞，Jun笑稱：「你學校長（譚詠麟）胡混過去就得。」而Jun畀唱Beyonce跳舞歌嘅君馨80分，略嫌佢唔夠爆發力，同埋唱至後段把聲好攰；而倫永亮就彈佢兩個口齒不清有懶音，所以兩女分數唔算高。
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！