睇歷史書話隋朝皇帝隋文帝嚴刑峻法，盜一錢者棄市。香港歷史也可寫下新篇章，講粗口者，重案組跟進！
重案組，有名你叫，重，唔重要唔重大都唔會叫「重案組」；你有無聽過有人隨地吐痰會由重案組跟進？
成龍拍的《重案組》電影如果開拍續集，你能想像他的任務是「處理驚天爆粗事件」嗎？
警方的briefing是「此人有大殺傷力粗口武器，可連發十六個字粗口無一重複，仲要精通多國語言，ｆ字頭門字部潮州福建運用嫻熟，各位伙計要小心，最好着避彈衣。今次行動，free fire，可隨時用仆×、頂你個×反擊！action！」
警方消息人士解釋，「由重案組跟進與案件的嚴重性或涉及辱罵警員無關」，吓？
咁點解會係「重案組」？
警方消息人士續稱，「案件本由旺角警區刑事調查隊負責，但由於他們須輪更工作，警方考慮後決定將案件與本月初在旺角行人專用區支持警方執法集會的案件，一併交由重案組跟進。」
嘩！原來係因為「阿sir唔得閒」？所以升呢交俾「重案組」跟？請問其他市民是否也會有相同待遇？食牛肉乾，交通部唔得閒，變咗重組案跟？
重案組如果唔得閒，會唔會「林老師爆粗事件已由Ｏ記接手，飛虎隊亦stand by」？
林老師粗口案件，同旺角行人專用區支持警方執法集會單嘢，點解可以一併處理？
林老師並無出席行人區的集會，而在行人專用區話自己受到生命威脅嗰位李偲嫣，亦無出現在林老師講粗口的場合。再者，兩宗案件性質完全不同，林老師罪名最多係「行為不檢」，李偲嫣嗰單係「刑事恐嚇、普通襲擊及刑事毀壞恐嚇罪」，如何能由重案組統一跟進？
阿Sir欺人太甚，莫非真想激全民爆粗？