【銅鑼灣】黃翠如同洪永城嘅緋聞傳出多時，雖然兩人否認戀情，但佢哋已經被視為一對，仲好有情侶feel㖭。呢對緋聞男女終於喺無綫新劇《愛我請留言》入面真係做情侶。早前夜晚10點幾，翠如BB同洪永城喺銅鑼灣時代廣場對出拍外景，話就話係情侶，但拍咗兩個鏡頭，都係講佢哋一前一後保持一段好遠嘅距離兼冇交談，兩個分隔好遠，但同時望住個大電視，好似心有靈犀咁喎。
冧爆粉絲
拍攝時間唔算太夜，所以引嚟唔少途人圍觀，好多人攞住手機對住無綫呢位新晉花旦係咁影，不過好多自由行遊客對黃翠如唔多認識，但好多香港人認得，不停咁叫翠如BB，大約一粒鐘後就拍完，臨走前翠如BB俾佢啲粉絲拉住合照又傾偈，見佢對粉絲好友善同親切，冧完粉絲就收工走人。
採訪、攝影：朱志聰、吳耀輝
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！