今年港股有波幅冇升幅，成交相當一般，集資過百億元嘅新股一隻手數得晒，投資銀行生意麻麻唔再係新聞，亦唔興裁員，而係久不久就向個別部門嘅一、兩位同事講拜拜，不過，日資行野村就揀咗呢個時候請人擴充業務。
聽聞，野村證券部最近向美銀美林撬咗5名猛將，話要趁呢個股市低潮，組織一個好嘅團隊，等個市好番，可以即刻食到個市反彈嗰條水喎。其中一位被野村羅致嘅係黃英健（Stanley Wong），佢喺證券界打滾17年，經驗豐富，喺野村做北亞區股票銷售部主管。
野村舊年底開始重整環球市場業務，今年3月，請嚟2011年離開美銀美林嘅Yasuhiro Fujiwara，負責日本以外亞洲股票市場，要組隊，先向舊舖埋手都好合理。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange