英超上周開鑼，記得以前每逢踏入8月，球迷指定動作就係儲報頭，或加錢換購各大報章雜誌推出的球季前瞻特刊。一書在手，盡掌廿支球隊資料，幾爽！高峯期，內地雜誌《足球周刊》加入戰團，我對「足周」當年的《意甲圖鑑》最懷念，逾百頁粉紙精美印刷，詳盡到你睇唔晒，甚至每隊均有跨版刊載的20位主力照片及資料，堪稱「講波佬恩物」。
可惜，說「懷念」即是消失了，都不記得足周有多少年沒推出前瞻特刊，我手上最後一本《意甲圖鑑》是08/09球季；而《足球周刊》香港繁體版亦消失了一段時間。可見出版行業，不是用心就可賺錢。
小弟也當過體記，深明製作季前特刊難處；早年，同行間梗係鬥早出，行船爭解纜嘛！但在約03年開始正式設立轉會窗制度後，各隊主力陣容集中在8月最後一周才密集式大變，這就慘了！「快」，只係等於資料唔準；但話明前瞻，點都要開鑼前（8月中至尾）出版啩？如果特刊面世後一周，一到9月陣容全不update，點算？足周的《意甲圖鑑》有一年便索性在球季開鑼後，9月初轉會窗關閉後才出爐，各隊名單包冇錯喇！可惜，已過了球迷買特刊的「心理黃金期」：「都開晒波咯！唔買了！」最後一個解纜，又行唔通。再者，還是那句老話：互聯網發達，球迷掌握資訊渠道多的是，仲嘥幾十蚊成本印出來的紙書，好難撈！
方柏翹
相戀54年！倪匡向全世界說：「到現在這麼多年，還是這麼深愛太太！」
你都想分享一點甜蜜？立即重溫今周《亂噏24》！
http://bit.ly/appletalk24