講起蘋果前行政總裁，大家可能只會諗起蘋果教主喬布斯，未必會諗起斯卡利（John Sculley）。
其實斯卡利喺1985年做過蘋果揸弗人，最近佢對被視為大鱷嘅著名維權投資者伊坎（Carl Icahn）搵蘋果行政總裁庫克傾偈，施軟工逼蘋果擴大股份回購計劃睇唔順眼，話換轉係喬布斯，真係啋佢都儍！
74歲嘅斯卡利認為，伊坎近日嘅舉動，只係想趁蘋果股價低迷攞着數，並非長線投資。以喬布斯嘅性格，對住班維權投資者，可能電話都費事聽。如果想蘋果股價升，最緊要產品有突破。
對庫克有信心
雖然佢對庫克同伊坎對話唔多高興，但佢對庫克嘅領導都相當有信心，又估計智能手錶將成為蘋果嘅秘密武器。
另外，斯卡利睇咗《喬布斯》傳記電影，仲好開心話部戲幫佢大平反，重申無論戲內戲外，佢都冇炒過喬布斯。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange