台灣成功逼使菲律賓就漁民洪石成被公務人員射殺一事認錯、賠錢、懲處，更顯出香港及北京政府之無能。
謝廷駿家人謝志堅到觀塘地區show，親身質問689，佢話一年來見過菲律賓駐港領使23次，但事實上巿民見到係毫無進展。
實利主義 京難為港出頭
台灣同菲律賓冇正式邦交，但仍用強硬行動，逼菲律賓政府妥協，任何外交角力，冇可能靠見面，一定係以行動為後盾，否則就係lip service，扮做嘢。而香港冇外交，一切行動要靠北京作後盾。
人質事件一年後，阿基諾三世訪北京，大家簽訂了70億元商業合同，而期間並無處理過人質問題，為香港死傷者及家屬討回公道。
當然，從北京外交角度，菲律賓親美，近年東南亞國家亦感受到中國的威脅，越南、緬甸已同美國「眉來眼去」，北京唔會逼人太甚，而菲律賓亦唔會畀面，因背後有美國撐腰。
反而台灣同菲律賓都係由美國負責「睇場」，大家都要畀面大佬，菲律賓可以唔騷馬英九，但不能完全無視美國壓力，美國亦要擺平自己陣營內部矛盾，唔想見到自己兩條𡃁打起上嚟。
689與黎棟國唔好再扮做嘢，其實大家都明白，兩人見多100次領事，亦根本無能為力為死傷者討回公道，佢哋只要公開表示過去有否向外交部以及國家領導人提出過要求，由北京直接向阿基諾三世施壓。
其實講真嗰句，要爭取香港人心，唔係靠國民教育，內地交流團或政治宣傳，只要北京公開代表香港人向阿基諾三世表達家屬訴求，至少香港人條氣會順啲。問題係北京外交政策以實利為主，少談理念價值，究竟會否代港人出頭？機會唔大。
下個月東盟博覽會在廣西南寧開幕，阿基諾三世曾表示自己希望可以出席，毋須等到APEC會議，北京也可趁機向菲方施壓。
香港人對呢場人質事件慘劇至今仍未忘記，心中對菲律賓政府仍有怨憤，三年來只見謝廷駿家人四處奔走，求助無門，每次只係一堆空洞承諾，從未兌現，大家感受唔到作為中國國民嘅尊嚴與光榮。
國家歸屬感，只有在悲劇、危機中，國家能為國民維權才能凸顯出來！
添馬男
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange