狼振英嘅語言「偽」術有幾到家？相信之前「表演」過咁多次，冇人會質疑佢嘞啩。噚日佢再施展看家本領，喺地區論壇上得意洋洋咁話，多謝四位副局長「主動」出席聽民意，若然大家見到四位副局當時嘅「應酬式笑容」，肯定feel得到：狼振英又喺度呃市民嘞！
全程齋坐冇人知
話說狼振英噚日喺地區論壇會場，發現四位副局長包括環境局陸恭蕙、運輸及房屋局邱誠武、教育局楊潤雄同財經事務及庫務局梁鳳儀齊齊坐喺第一行時，竟然好似發現新大陸咁，聲稱班局長係「自動嚟」，冇叫過佢哋㗎喎，狼英聲稱自己都係嚟到先知佢哋喺度，仲鼓勵副局多啲落區近距離聽民意𠻹。
係囉，好似財經局副局長咁，都唔知佢落區有乜作用。唔通同市民分享吓炒股心得？又再講吓必要時會「用盡彈藥」救市咁話呀？
此「自動嚟」之說一出，唔少政府中人都O晒嘴。有官場中人同八方講，狼英雖然冇親口叫副局出席，但政府有吖嘛，咁都叫「自動嚟」？雖則特首辦係冇硬性規定，但都有「邀請」副局喺幾場論壇中，得閒嘅就參加吓喎，懶理大家屆時空有軀殼而冇靈魂，因為重點係幫狼英做人肉佈景板，拍拍手撐場做啦啦隊已經好夠。
事實上四位副局噚日全程齋坐後就拜拜咯。有記者謔笑，如果狼英唔提，真係唔知有成四個副局坐足全程喎。
李八方
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange